Ампутант футболчилар ўртасидаги жаҳон чемпионатида бронза медалини қўлга киритган Ўзбекистон терма жамоаси аъзолари 3 декабрь куни Cobalt автомобиллари билан тақдирланди. Бу ҳақда Миллий олимпия қўмитаси (МОҚ) матбуот хизмати хабар берди.
Миллий Паралимпия қўмитасида ўтган тақдирлаш маросимида Ўзбекистон президентининг маслаҳатчиси Одил Абдурахманов, спортни ривожлантириш вазири Адҳам Икрамов, Миллий Паралимпия қўмитаси раиси Мухторхон Ташходжаев, МОҚ бош котиби Ойбек Касимов, қўмита раисининг биринчи ўринбосари, ЎФА биринчи вице-президенти Равшан Ирматов, футбол бўйича Ўзбекистон амутантлар терма жамоаси вакиллари иштирок этди.
Расмийлар терма жамоанинг қўлга киритган муваффақияти билан яна бир бор қутлаб, улардан келгусида ҳам улкан ғалабалар кутиб қолишларини билдирди. Шунингдек, ампутант футболчиларнинг бундай рағбатлантирилиши имконияти чекланган бошқа ҳамюртларимизнинг спорт билан шуғулланишлари учун катта мотивация бўлишини алоҳида таъкидлади. Тадбир сўнггида спортчиларга автмобиллар топширилди.
9 октябрь куни ампутантлар ўртасида футбол бўйича Ўзбекистон миллий терма жамоаси Гаити жамоасини мағлуб этиб, Жаҳон кубогида учинчи ўринни эгаллади. Бу терма жамоанинг турнир тарихидаги еттинчи медали бўлди.
Аввалроқ терма жамоа аъзолари YouTube’даги SUBYEKTIV лойиҳасида уларга 3-ўрин олгани учун 10 млн сўмдан пул мукофоти берилганини айтиб, бундан норозиликларини билдирганди. Спортчилар уларга эътиборсизлик бўлаётгани, шунингдек, машғулотлар учун ҳаражатларнинг барчасига ўз ёнидан пул тўлаши ҳақида гапирганди.
Кўрсатув эълон қилингач, спортни ривожлантириш вазири Адҳам Икрамов терма жамоа аъзолари билан учрашув ўтказиб, уларни қўшимча рағбатлантиришга ваъда берганди.
