16 ноябрь куни АҚШ Миллий аэрокосмик агентлигининг (NASA) Artemis I лойиҳаси доирасида учувчисиз Orion космик кемаси 21 ноябрь куни Ойга учиб, унга энг яқин масофада парвоз қилди, дея хабар берди NASA. Кема Ой юзасидан тахминан 130 км баландликдан ўтди, шундан сўнг у баландроқ орбитага кира бошлади.
Кема, хусусан, 1969 йилда астронавтлар билан бирга «Аполлон-11» космик кемасининг қўнган жойи — Тинчлик денгизи устидан тахминан 2250 км баландликда учиб ўтди. Кейинчалик «Аполлон-14» ва «Аполлон-12» қўниш жойларида бўлди.
Orion камерасидан Ойнинг нариги томонидан олинган сурат. Фото: NASA.
25 ноябрь, жума куни у Ойдан 92194 км узоқликдаги чуқур орбитага чиқади ва 26 ноябрь куни Ердан 400 171 км узоқликдан ўтиб «Аполлон-13» томонидан ўрнатилган рекордни янгилаши керак бўлади. У 28 ноябрь, душанба куни Ердан максимал масофага — 432 192 кмга етиб боради.
«Жараён биз режалаштиргандек давом этмоқда. Ер тизимлари, ишчи кучларимиз ва Orion космик кемасининг ҳаракати кутганимиздан ошиб бормоқда ва биз кенг фазони янги космик кемада ўрганишни давом эттирмоқдамиз», — деди Artemis I миссияси директори Майк Сарафин.
Artemis I миссияси ўтган чоршанба куни Флоридадаги космодромдан дунёдаги энг кучли ракета — Space Launch System учирилиши билан бошланди. Тахминларга кўра, кема Ерга 11 декабрь куни қайтиб келади, миссиянинг умумий давомийлиги 25 кунни ташкил қилади.
Жараён NASA томонидан Artemis II миссияси доирасида космик кема учирилиши олдидан Ой ва Марсни тадқиқ қилиш бўйича лойиҳанинг муҳим қисмидир. Бунда миссия 3 марта кечиктирилган эди.
Парвознинг одамларга таъсирини ўрганиш учун Orion бортида сенсорли учта манекен учади. Фото: NASA.
«Артемида» дастури инсоннинг Ойда узоқ муддат бўлиши учун мўлжалланган бўлиб, у Марсга парвоз учун «трамплин» бўлиб хизмат қилади.
Кемада ҳақиқий экипаж ўрнига учта манекен космосда одамлар учун ортиқча юкларнинг, космик нурланишнинг ва бошқа омилларнинг таъсирини ўрганиш учун жойлаштирилган.
Artemis I миссияси. Манба: NASA.
