Регистон майдонида Туркий давлатлар ташкилоти Самарқанд саммити доирасида ташкилотга аъзо ва кузатувчи мақомидаги мамлакатлар етакчилари иштирокида «Яшил макон» лойиҳаси доирасида кўчат экиш тадбири бўлиб ўтди. Бу ҳақда «Газета.uz» мухбири хабар бермоқда.
ТДТга аъзо бўлган Туркия, Озарбайжон, Қозоғистон, Қирғизистон ҳамда кузатувчи мақомига эга бўлган Венгрия ва Туркманистон давлатлари пойтахтларида ҳам бир вақтнинг ўзида уюштирилган кўчат экиш тадбирлари онлайн мониторда намойиш этилди.
11 ноябрнинг ўзида Ўзбекистон бўйлаб 2,5 млн туп, қолаверса, Озарбайжонда 111 минг туп дарахт экилади.
Президент Шавкат Мирзиёев Регистон майдонида «Яшил макон» лойиҳаси доирасидаги кўчат экиш маросимида нутқ сўзлади.
«Кўҳна Турон гавҳари, Туркий цивилизация пойтахти бўлмиш азим Самарқанд шаҳрида сизларни яна бир бор қутлашдан мамнунман. Бугун биз Туркий давлатлар ташкилотининг илк тарихий саммитини ўтказдик, муҳим қарорлар қабул қилдик. Туркий дунё цивилизациясининг янги даврини бошлаб берадиган Самарқанд декларациясини имзоладик», — деди у.
«Айни вақтда не-не тарихий воқеаларга гувоҳ бўлган муҳташам Регистон майдонида туриб, туркий дунё цивилизациясининг янги босқичига рамзий маънода қадам қўймоқдамиз. Улуғ аждодларимизга хос бўлган азалий анъаналарни давом эттирган ҳолда, яна бир хайрли ташаббусни бошламоқдамиз», — дея таъкидлади Шавкат Мирзиёев.
«Ўзбекистонда „Яшил макон“ дастури изчил амалга оширилмоқда. Туркманистонда барча вилоятлар ва пойтахт Ашхободни яшил ҳудудга айлантиришга қаратилган узоқ муддатли Миллий ўрмон дастури самарали ишлаяпти. Қардош Туркияда эса ҳар йили 11 ноябрь — Миллий кўчат экиш куни сифатида кенг нишонланмоқда. Озарбайжонда кўп йиллардан буён „Яшил марафон“ дастури асосида кўчат экиш ташаббуслари муваффақиятли амалга оширилмоқда», — деди Ўзбекистон раҳбари.
«Қозоғистонда барча ҳудудларни кўкаламзорлаштириш бўйича беш йиллик умуммиллий дастур бажарилмоқда. Қирғиз Республикасида 2022 йил „Тоғ экотизими ва иқлим барқарорлиги йили“, деб эълон қилинди ҳамда унинг доирасида „Яшил мерос“ миллий кампанияси фаол давом эттирилмоқда. Венгрия Ҳукуматининг шаҳарларни қўшимча кўкаламзорлаштириш бўйича олиб бораётган йирик дастурини чин дилдан олқишлаймиз», — деди у.
«Биз бугун туркий дунё ҳурматли етакчиларининг ушбу табаррук заминга ўз қўллари билан кўчат экаётганларини юксак қадрлаймиз. Зеро, бу ниҳоллар — ҳаёт дарахт-лари, дўстлик ва ўзаро ишонч, маънавият ва келажак боғлари бўлиб қад ростлайди. Туркий халқларимизда „яхшидан боғ қолади“, деган ҳикматли сўз бор. Ишончим комилки, бугун биз яхши ниятлар билан яратаётган боғу роғлар самарасидан ҳозирги ва келажак авлодларимиз албатта баҳраманд бўлади», — деди Шавкат Мирзиёев.
