7 ноябрь куни Ўзбекистон ва Хитой ўртасида видеоконференция шаклида коронавируснинг Omikron-Delta штаммига қарши янги рекомбинант оқсилли вакцинанинг халқаро клиник синовини бошлаш маросими бўлиб ўтди. Бу ҳақда Инновацион ривожланиш вазирлиги матбуот хизмати хабар қилди.
Вазир Иброҳим Абдураҳмонов икки мамлакат ўртасидаги иккинчи авлод вакциналари бўйича ҳамкорлик муваффақиятли якунланиб, Ўзбекистон ва барча мамлакатлар учун янги имкониятлар очишига ишонч билдирди. Вакцинанинг мамлакатда синовларини бошлаш учун Этика қўмитасининг рухсати олингани ва тадқиқотлар ҳамда клиник синовларни бошлаш арафасида турилганини қайд этди.
Академик Gao Fu Хитой ва Ўзбекистоннинг икки томонлама саъй-ҳаракатлари билан ZF2001 ёки ZF-UZ-VAC-2001 янги коронавирусга қарши вакцинанинг биринчи авлоди муваффақиятли ишлаб чиқилгани ва бутун дунё бўйлаб 300 миллиондан ортиқ доза қўлланилиб, глобал эпидемияга қарши курашга катта ҳисса қўшилганини алоҳида таъкидлади.
Таъкидланишича, янги коронавирус вакцинасининг иккинчи авлоди Omicron-Delta икки валентли протеин субунит вакцинасидир. Вирус прототипига асосланган биринчи авлод вакцинаси билан солиштирганда, янги вакцина кенгроқ ва кучлироқ иммун реакциясини келтириб чиқаради, ҳозирда кенг тарқалган омикрон субвариантларини қамраб олади ва омикроннинг кўтарилиши даврида янги коронавирус пандемиясини назорат қилишга муҳим ҳисса қўшади.
«„Бир макон — бир йўл“ ташаббусининг муҳим бўлими сифатида ANSO иккинчи авлод вакцинасининг хориждаги клиник синовларини қўллаб-қувватлаш учун барча саъй-ҳаракатларни амалга оширади. Бу ҳамкорлик миллий имиджни янада мустаҳкамлайди, Хитой ва Ўзбекистон ўртасидаги дўстлик ришталари ва тиббиёт соҳасидаги ҳамкорликни ривожлантиришга хизмат қилади», — деди Хитой касалликларни назорат қилиш ва профилактика маркази директори Cао Жингҳуа.
Ички ишлар вазирлиги тиббиёт бирлашмаси бошлиғи, полковник Шуҳрат Нишонов дунёда коронавирус касаллиги авж олганида хитой-ўзбек вакцинаси қўл келганини, ZF-UZ-VAC2001 вакцинасининг таркибда қўлланиши, аввалига, янгилик бўлгани ҳақида гапирди.
«Шахсий таркибимизда касалликлар аниқланиши вакцина қўлланилганидан сўнг кескин камайганди. Шу сабабли ушбу вакцинага нисбатан ишончимиз ошганди. Ҳозирги кунга қадар шахсий таркибнинг деярли 100 минг нафар ходимига вакцинация қилинган. Ва у ҳозирга қадар касалликка нисбатан ўз самарасини кўрсатиб турибди», — деди у.
Иккинчи авлод оқсил вакцинасининг антигенлари янги коронавируснинг дельта ва омикрон мутация штаммлари учун мўлжалланган бўлиб, улар ҳозирда кенг тарқалган янги коронавирус омикрон мутация штаммларидан яхшироқ ҳимоя қилиши кутилмоқда. Омикрон штаммининг янги мутацияси бутун дунёда давом этаётган бир пайтда, COVID-19 пандемиясига қарши Хитой ва Ўзбекистон ҳукуматлари ўз ҳиссасини қўшган ҳолда «самарали ва узоқ муддатли ҳимоя вакцинасини яратишга умид қилмоқда».
«Бизда жуда катта жамоа шаклланган ва бу лойиҳа муваффаққиятли ўтишига ишонамиз. Бунга барча имкониятларимиз ва тажрибамиз ҳам етади. Энг муҳими, бизнинг ҳамкорларимиз ҳамда икки давлатнинг сиёсий иродаси бизга куч бағишлайди. Барча тадқиқотчиларни янги авлод вакцинаси билан табриклаб, муваффақиятлар тилайман», — деди вазир Инновацион ривожланиш вазири Иброҳим Абдураҳмонов.
