30 октябрь куни Ҳиндистоннинг Гужарат штатидаги Морби шаҳрида бир асрлик осма кўприкнинг қулаши оқибатида 132 киши, жумладан, болалар ҳалок бўлди, деб ёзмоқда The Times of India нашри.
Қайд этилишича, 100 га яқин жабрланувчи шифохоналарга ётқизилди, уларнинг аксарияти оғир аҳволда. Шунингдек, дарёдан 170 дан ортиқ одам қутқариб олинди.
Тахминан етти ойлик таъмирлаш жараёнида ёпилган кўприк фожиадан атиги беш кун олдин очилганди. Воқеа сабабларини ўрганиш, хусусан, кўприкда кўп сонли одамлар тўпланишига айбдор шахсларни аниқлаш учун ҳукумат қўмитаси тузилди. Ҳиндистон ички ишлар вазири Харш Сангавининг айтишича, ҳалокат вақтида кўприкда 150 га яқин одам бўлган.
Аниқланишича, реконструкция билан шуғулланган хусусий компания кўприк хавфсизлиги бўйича ҳужжат олмаган.
«Морби ҳодисасидан жабрланган оилаларга чуқур ҳамдардлик билдираман. Ҳукумат барча зарур ёрдамни беради», — дея таъкидлади мамлакат бош вазири Нарендра Моди.
