17 октябрь куни кечқурун Россиянинг Краснодар ўлкаси Ейск шаҳридаги турар-жой биноси ҳовлисига товушдан тез учувчи Су-34 қирувчи-бомбардимончи самолёти қулаб тушди, дея хабар бермоқда «РИА Новости» Россия мудофаа вазирлиги матбуот хизматига таяниб.
Ҳалокат «Жанубий ҳарбий округ ҳарбий аэродромидан ўқув парвози учун» кўтарилиш чоғида содир бўлган. Учувчилар катапульта қилишга муваффақ бўлишди. Уларнинг таъкидлашича, ҳалокатга двигателлардан бирининг ёниши сабаб бўлган.
Мудофаа вазирлиги ҳалокат жойида ёқилғи ёниши содир бўлганини маълум қилди. ОАВнинг ёзишича, ёнғин кўп қаватли уйнинг биринчи қаватидан бешинчи қаватигача қамраб олган.
Россия Telegram-каналларида эълон қилинган видеолавҳаларда ҳалокат жойи яқинидаги уй ёниб кетганини кўриш мумкин. Баъзи лавҳаларда учувчининг парашюти кўрсатилган.
Воқеа жойида фавқулодда хизматлар ишламоқда. Ҳалок бўлганлар ва жароҳатланганлар ҳақида маълумотлар аниқланмоқда.
