14 октябрь куни Қорақалпоғистонда содир бўлган тартибсизликларда гумон қилинган 22 нафар фуқаро Қорақалпоғистон Жўқорғи Кенгеси раисининг сўрови ҳамда депутатлик кафолатлари ҳамда шахсий дахлсизлик тамойили асосида уйларига қайтарилди. Бу ҳақда Жўқорғи Кенгес матбуот хизмати хабар берди.
Қўзғолонларда иштирок этганликда гумон қилиниб, олиб кетилган шахслар содир этган жиноятидан пушаймонлиги, оила аъзолари берган ҳужжатларни ўрганганлиги ва жиноят содир этганликларини инобатга олиб, уларни яқинларига қайтаришга қарор қилинди. «Улар оиласида ягона боқувчи», — дейилади хабарда.
Бундан ташқари, шу куннинг ўзида яна Нукус, Шимбай, Кегейли, Хожели, Шоманай ва Камликўл туманларидан яна 16 киши ҳам озодликка чиқарилди.
Эслатиб ўтамиз, жорий йилнинг августида Нукусдаги воқеаларни ўрганиш бўйича парламент комиссияси таклифи ва Қорақалпоғистон Жўқорғи Кенгеси илтимосномасига кўра, намойишларда гумонланган 24 нафар фуқаро жамоат кафиллиги асосида ўз оиласига қайтарилганди.
Август охирларида намойишларда иштирок этганликда гумонланаётган яна 10 нафар фуқаронинг қамоқ эҳтиёт чораси уй қамоғига алмаштирилди.
