Қорақалпоғистонда бўлиб ўтган воқеаларни мустақил равишда ўрганаётган Комиссия аъзолари таклифи ва Қорақалпоғистон Республикаси Жўқорғи Кенгеси илтимосномасига кўра, яна10 нафар фуқаронинг қамоқ эҳтиёт чораси уй қамоғи тарзидаги эҳтиёт чорасига алмаштирилди.
Аввалроқ Бош прокуратура томонидан 24 нафар гумонланувчининг жамоат кафиллиги асосида ўз оиласига қайтарилгани ҳақида хабар берган эдик. Шундай қилиб, 30 август кунининг ўзида жами 34 нафар фуқаро инсонпарварлик тамойили асосида оиласи бағрига қайтарилди.
Қайд этилишича, Бош прокуратурага киритилган рўйхат намойишларда иштирок этганликда гумон қилиниб, олиб кетилган шахсларнинг оила аъзолари томонидан Комиссияга қилинган мурожаатларининг ўрганилиши ва гумонланувчилар билан шахсан суҳбатлашиш асосида шакллантирилган.
Ушбу фуқароларнинг Қорақалпоғистонда бўлиб ўтган воқеаларда содир этган қилмишларидан пушаймон эканлиги, қарамоғида вояга етмаган фарзандлари борлиги, шунингдек оилавий шароити оғир эканлиги, баъзи шахсларнинг оилада ёлғиз боқувчи бўлганлиги эътиборга олинган.
