9 октябрь куни Туркиянинг Истанбул шаҳри Кадикўй туманида 3 қаватли уйда содир бўлган портлаш ва унинг ортидан келиб чиққан ёнғинда ҳалок бўлган уч кишининг икки нафари Ўзбекистон фуқаролари экани аниқланди. Бу ҳақда Haberturk нашри хабар бермоқда.

Қайд этилишича, Фикиртепе маҳалласида соат 19.05 да 3 қаватли бинонинг 3-қаватида чиққан ва ёнидаги 2 та бинога ёйилган ёнғинни ўчиришга жами 56 ўт ўчирувчи ва 19 та техника жалб қилинган. Аланга 3 соат давом этган саъй-ҳаракатлар билан ўчирилган. Бироқ ёнғиндан катта зарар кўрган бинодан уч кишининг жасади олиб чиқилган.

Ҳодисада Ўзбекистон фуқароси ҳисобланган А. К. жароҳат олиб, шифохонага ётқизилган. Унинг 68 ёшли отаси М. К.,10 ёшдаги қизи Н. К. ҳамда шахси аниқланмаган яна бир кишининг ҳалок бўлгани аниқланган.

Ўзбекистоннинг Истанбулдаги Бош консулхонасидан «Газета.uz»га маълум қилинишича, айни пайтда консулхона ходимлари жароҳатланган фуқаронинг аҳволидан бохабар бўлиб турибди, шунингдек, марҳумларнинг жасадларини Ўзбекистонга жўнатиш масалалари билан шуғулланмоқда.