Марказий банк маълумотларига кўра, миллий валютадаги ўртача тортилган фоиз ставкалари кетма-кет учинчи ой пасаймоқда. Август ойи якуни бўйича бу кўрсаткич 22,2% ни ташкил этди.
Бу Марказий банкнинг апрель ойидаги асосий ставкани ошириши ортидан кейин қайд этилган минимал кўрсаткичдир.
Аҳоли учун кредитлар бўйича фоизлар ўртача 22,7% га камайди — бу охирги беш ой ичида энг паст даража. Шу билан бирга, бизнес кредитлари икки ойлик пасайишдан сўнг яна қимматлаша бошлади ва 21,9% ни қайд этди.
Қисқа муддатли кредитлар бўйича ставка (365 кунгача) июль ойида кескин пасайишдан кейин (22,4% дан 20,8% гача) 21,2% га етиб, яна ўсишни бошлади. Узоқ муддатли кредитлаш эса 22,5% га етди.
Имтиёзли кредитлар бўйича ўртача ставка ҳам 12,2% га кўтарилди. Имтиёзли қисқа муддатли кредитлар 0,4% га — 11,7% га қимматлашди, 3 йил ва ундан ортиқ муддатга бериладиган кредитлар бўйича фоизлар пасайди.
Уч ой давомида 6,7% даражасида сақланиб қолган хорижий валютадаги кредитлар бўйича ўртача фоиз август ойида бирданига 0,7% даражага кўтарилиб, 7,4% ни ташкил этди. Бу 2020 йил май ойидан (7,5%) бери энг юқори кўрсаткич.
Қисқа муддатли кредитлар бўйича ставкалар 0,4% га ошиб, 7,5% ни, узоқ муддатли кредитлар бўйича 0,9% га ошиб, 7,3% ни ташкил этди.
Август ойининг охирида президент Шавкат Мирзиёев кичик бизнес лойиҳаларини молиялаштириш учун 20 триллион сўм ажратилиши ва ўрта бизнесни кредитлаш учун 700 миллион доллар жалб этилишини маълум қилди. 1 октябрдан гаров сифатида муомаладаги товарлар, экспорт шартномалари, аккредитивлар ва келажакдаги тушумлардан фойдаланишга рухсат бериш режалаштирилган эди.
