Ўзгидромет сентябрь ойидаги об-ҳаво шарҳи ва октябрь учун тахминий прогнозларни эълон қилди. Синоптикларнинг таъкидлашича, бу йил октябрь ойининг биринчи беш кунлиги қуруқ ва бироз илиқ об-ҳаво билан бошланади. Кундуз кунлари қуёш нурлари ҳавони +22…+25 даражагача иситади.
Фақат кечаси ва эрталаб ҳаво ҳарорати +10…+13 даражагача анча салқин бўлади. Кейинчалик ойнинг биринчи ўн кунлиги охиригача об-ҳаво шароитида кескин ўзгаришлар кутилмайди.
Иккинчи ва учинчи ўн кунликларда ҳудуднинг катта қисмида ҳарорат кечалари +8…+13 даражадан 0…+5 даража илиқгача, кундуз кунлари +18…+23 даражадан +10…+15 даража илиқгача ўзгариб туриши кутилмоқда.
Кечаси ва эрталаб баъзи жойларда 0…+1 даражагача совуқ тушиши мумкин. Иккинчи ва учинчи ўн кунликларнинг айрим кунларида асосан ёғингарчилик бўлиши кутилмоқда.
Умуман, ҳарорат тартибига кўра, октябрь ойи меъёр атрофида, баъзи жойларда меъёрдан 1…1,5 даражага кам, ёғингарчилик меъёр атрофида, баъзи жойларда меъёрдан кўп бўлиши прогноз қилиняпти.
Иқлимий меъёрларга кўра, Ўзбекистоннинг жанубий вилоятларида ёғингарчилик октябрь ойида 3 кундан 5 кунгача, қолган ҳудудларда эса 5 кундан 7 кунгача бўлиши мумкин. Бу ойда ёғингарчилик асосан ёмғир кўринишида бўлади, аммо ҳавога кескин совуқ кузатилиши сабаб ёмғир қисқа муддатга қорга айланиши эҳтимоли ҳам бор.
Тунги ҳаво ҳароратининг ўртача йиллик қиймати +6…+11 даражани ташкил этади, лекин кўпинча октябрда, айниқса ойнинг иккинчи ярмида биринчи кузги совуқлар кузатилади. Кундузги ҳарорат эса одатда +23…+28 даражадан +10…+15 даражагача ўзгариб туради. Баъзида ҳароратнинг ёки ёғингарчиликнинг ҳақиқий қийматлари кўп йиллик давр қийматларидан сезиларли даражада фарқ қилиши мумкин.
Масалан, Тошкентда айрим йилларда октябрь ойида максимал ҳаво ҳарорати +33…+36 даражага етган. Бу ойдаги ҳароратнинг мутлақ максимуми (1941 йилда) +37,5 даража бўлган.
Энг минимал ҳароратнинг рекорди эса -11,2 даражагача етган. Аммо бу жуда узоқ вақт олдин, ўтган асрнинг бошларида кузатилган ҳолат эди. Охирги 20 йил ичида Тошкентда минимал ҳарорат +1…+2 даража совуқдан пастга тушмади.
2015 йилнинг октябрь ойида Тошкентда ёғингарчиликнинг бир ойлик меъёридан 3,5 баробари, яни 1 кунда бир ойлик меъёр (деярли 25 мм) ёғган. Бу сўнгги 20 йил ичида ёғингарчилик энг кўп бўлган октябрь деб ҳисобланади.
Камдан-кам ҳолларда бу ойда Тошкентда умуман ёғингарчилик кузатилмаган. Охирги марта бундай ҳолат 2020 йилнинг октябрь ойида кузатилган.
