Тошкент, Самарқанд ва Жиззах вилоятларида электр энергиясидан қарздорликларни йўқ қилиб беришни ваъда қилган ходимлар қўлга олинди, дея хабар қилмоқда Бош прокуратура ҳузуридаги Иқтисодий жиноятларга қарши курашиш департаменти.
Департаментнинг Тошкент вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан ИИБ ходимлари билан ҳамкорликда тезкор тадбир ўтказилган.
Унда Пискент туман электр таъминоти корхонаси бошлиғи У.Х. тадбиркор Б.га тегишли кичик ишлаб чиқариш корхонасининг 106 млн сўм электр энергиясидан қарздорлигини йўқ қилиб бериш эвазига корхона қоровули О. орқали 6 млн сўмни олган вақтида ашёвий далиллар билан ушланган.
Бундан ташқари, Ургут туман бўлими томонидан ўтказилган терговга қадар текширувда, туман электр таъминоти корхонасида бўлим раҳбари вазифасида ишловчи С.Т. ва бошқалар «К.Б.» фермер хўжалиги раҳбари А.Н. ва «А.Й.» МЧЖ раҳбари У.Х.нинг электр энергиясидан қарздорлигини сўндириш учун 35 млн сўм ва 300 АҚШ долларини қўлга киритиб, ўзларининг шахсий эҳтиёжи учун ишлатиб юборгани аниқланган.
Шунингдек, департамент ҳамда ДХХнинг Жиззах вилояти бошқармалари томонидан ўтказилган тезкор тадбирда, Ш. Рашидов туман электр таъминоти корхонаси ҳуқуқшуноси Н.Д. фуқаро Р.нинг хонадонида электр энергиясидан ноқонуний фойдаланганлиги ҳолати бўйича ҳисобланган 6,2 млн сўм қарздорликни йўқ қилиб бериш эвазига 1,9 млн сўмни фирибгарлик йўли билан олган вақтида ашёвий далиллар билан ушланган.
Ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
