Ўзбекистоннинг Киевдаги элчихонаси Украина Ташқи ишлар вазирлигига расмий нота юборди, дея хабар берилади дипломатик миссия сайтида.
Бунга Украина Қуролли кучлари томонидан, гўёки ушбу мамлакат ҳудудида жанг қилган икки ўзбекистонлик қўлга олингани акс этган видео ижтимоий тармоқларда тарқалгани сабаб бўлди.
Элчихона нотаси «ушбу вазият юзасидан батафсил ва ишончли маълумот олиш мақсадида» юборилган, дейилади хабарда.
«Ушбу видео бўйича тасдиқланмаган маълумотларни тарқатмасликни ва барча ҳолатлар бўйича якуний ойдинлик киритилишини кутишингизни сўраймиз, бу ҳақда кейинроқ эълон қилинади», — деб сўради Ўзбекистоннинг Украинадаги элчихонаси.
Бир неча кун олдин журналист Юрий Бутусов ўзининг видеорепортажида Украина Қуролли кучларининг Балаклея вилоятидаги қарши ҳужуми чоғида разведкачилар гуруҳи Россия карвонига пистирма уюштиргани ҳақида хабар берганди. Улар душман техникасининг бир қисмини йўқ қилишга, яна бир қисмини эса экипажлари билан бирга қўлга олишга муваффақ бўлишди, дея Бутусовнинг сўзларидан иқтибос келтиради Focus нашри.
Икки нафар асирга олинган шахс «Редут» хусусий ҳарбий компанияси таркибида жанг қилиш учун Ўзбекистондан Украинага келганини қайд этди. Хусусан, самарқандлик 22 ёшли талаба Муҳруддит Яраҳмедов миномёт батареясида бўлиб, ундан ўқ узганини айтган. У пул топиш мақсадида хусусий ҳарбий компанияга ишга киришга қарор қилган. Асирлардан яна бири Россияда беш йил ҳужжатсиз яшагани учун Украинадаги жанговар ҳаракатларда қатнашишга мажбур бўлганини таъкидлаган.
