24 август, чоршанба куни Украинанинг Днепропетровск вилоятидаги поезд ва Чаплино вокзалига ракета ҳужуми уюштирилди. Бу ҳақда президент Владимир Зеленский БМТ Хавфсизлик кенгаши йиғилишидаги видеоалоқа орқали сўзлаган нутқида маълум қилди.
Давлат раҳбарининг сўзларига кўра, у ушбу маълумотни мурожаат билан чиқмоқчи бўлиб турган вақтида олган.
«Ҳозир тўртта енгиль автомобил ёнмоқда. Ҳозирча камида 15 киши ҳалок бўлган, 50 га яқин киши жароҳатланган. Қутқарувчилар ишламоқда. Аммо, афсуски, ўлганлар сони яна ортиши мумкин», — деди Владимир Зеленский БМТ Хавфсизлик кенгаши йиғилишида.
Кейинроқ президент девони раҳбари ўринбосари Кирилл Тимошенко станция ва турар-жой секторига ракета ҳужуми қурбонларининг умумий сони 25 кишини ташкил қилганини билдирди. Улардан икки нафари болалар — 11 ёшли бола уй вайроналари остида, 6 ёшли бола эса темир йўл вокзалига яқин жойда вагондаги ёнғин натижасида ҳалок бўлган. Унга кўра, 31 киши жароҳат олган.
Россия Мудофаа вазирлиги 25 август куни тушдан кейин Чаплинога қилинган ҳужумга изоҳ берди.
«„Искандер“ ракетасининг Днепропетровск вилоятидаги Чаплино темир йўл вокзалидаги ҳарбий эшелонга тўғри урилгани натижасида Донбасдаги жанговар ҳудудга йўл олган Украина Қуролли Кучларининг захирадаги 200 дан ортиқ ҳарбий хизматчиси ва 10 та ҳарбий техника йўқ қилинди», — дея хабар беради РИА Новости Мудофаа вазирлиги ҳисоботига таяниб.
