АҚШ президенти Жо Байден «Ал-Қоида» террорчилик ташкилоти етакчиси Айман аз-Завоҳирий Қўшма Штатларнинг Афғонистондаги аксилтеррор операцияси чоғида ўлдирилганини эълон қилди. Унинг нутқи Оқ уй сайтида эълон қилинган.
АҚШ раҳбарининг сўзларига кўра, ал-Завоҳирий ўтган шанба, 30 июль куни Кобулда ҳаво ҳужуми натижасида йўқ қилинган.
«Аз-Завоҳирий бин Лодиннинг одами эди. У 11 сентябрь терактлари пайтида «Ал-Қоида»нинг иккинчи қўмондони эди. У 11 сентябрь терактларини режалаштиришда фаол иштирок этган ва АҚШ ҳудудида 2977 кишининг ўлимига сабаб бўлган ҳужумлар учун жавобгар бўлган», — дея қайд этди Жо Байден.
АҚШ президентининг сўзларига кўра, ўнлаб йиллар давомида аз-Завоҳирий америкаликларга қарши ҳужумлар, жумладан, 2000 йилда 17 америкалик денгизчининг ўлимига сабаб бўлган «Коул» самолёт ташувчисининг портлаши, Кения ва Танзаниядаги АҚШ элчихоналарида 224 кишининг ўлимига сабаб бўлган портлашлар ортида турган.
«АҚШ 11 йил олдин бин Лодиндан қасос олганидан бери „Ал-Қоида“ етакчиси аз-Завоҳирий эди. У яшириниб, бутун дунё бўйлаб „Ал-Қоида“ бўлимлари фаолиятини мувофиқлаштирган, жумладан, устувор вазифаларни белгилаган ва оператив бошқарувни таъминлаган», — деди АҚШ раҳбари.
Шунингдек, у террорчилик ташкилоти етакчисини йўқ қилиш бўйича аксилтеррор операциясининг тайёргарликлари ҳақида гапирди.
«Бизнинг разведка Завоҳирийни шу йил бошида топди. У ўзининг яқин қариндошлари билан қайта бирлашиш учун Кобул марказига кўчиб ўтди. Ушбу миссия пухта режалаштирилган ва бошқа тинч аҳолига зарар етказиш хавфини қатъий равишда минималлаштирган. Унинг оила аъзоларидан ҳеч ким жабрланмади, тинч аҳоли орасида қурбонлар йўқ», — дея таъкидлади Жо Байден.
Унинг қўшимча қилишича, у ушбу янгилик билан миссиянинг тўлиқ муваффақиятли якунлангани тасдиқлангачгина ўртоқлашмоқда.
«Менинг администрациям „Ал-Қоида“ таҳдидларини, қаердан келган бўлишидан қатъи назар, ҳушёрлик билан кузатишда ва бартараф этишда давом этади», — дея ишонтирди АҚШ президенти.
