Буюк Британия Россиянинг Украинага бостириб кириши муносабати билан санкция жорий этилган шахслар рўйхатини кенгайтирди, дея маълум қилди Британия ҳукумати.
Бу сафар санкцион рўйхатга россиялик миллиардер Алишер Усмоновнинг жиянлари Сарвар ва Санжар Исмоиловлар, 29 нафар губернатор ва Россия адлия вазири Константин Чуйченко, шунингдек, унинг вазирликдаги «хорижий агентлар» реестри учун жавобгар бўлган ўринбосари Олег Свириденко киритилди. Рўйхатга жами 42 киши қўшилган.
Британия ҳукуматига кўра, Сарвар ва Санжар Исмоиловларнинг «Буюк Британияда катта манфаатлари бор, улар Лондоннинг энг қиммат ҳудудларидан ҳисобланган Хайгейт (XVIII асрдан қолган бинолардан иборат яшил турар-жой) ва Хемпстед-Хитда (Лондон шимолидаги ўрмон билан қопланган ҳудуд) уйларга эга эканликлари тахмин қилинади.
Улар Ўзбекистонда туғилган ва Россия фуқаролигини олган Гулбаҳор Исмоилованинг (Алишер Усмоновнинг синглиси) ўғилларидир. Гулбаҳор Исмоилова ҳам апрель ойида Британия санкциялари остида қолган.
Сарвар Исмоилов, шунингдек, Алишер Усмоновнинг бизнес шериги Фарҳод Моширийга тегишли «Эвертон» футбол клубининг собиқ директори сифатида ҳам қайд этилган.
Ака-укаларнинг Буюк Британиядаги активлари музлатилган, дейилади хабарда.
