Кўча рассоми Inkuzart бир вақтнинг ўзида иккита тасвирни бирлаштирган янги ижодий ишини тақдим этди. Булар — Россия ва Украина президентлари Владимир Путин ва Владимир Зеленскийнинг икки томондан чизилган портретлари. У турли бурчаклардан қаралганда тасвир ўзгариб турадиган «стерео-варио» откриткаларига ўхшайди.
Фото: Евгений Скляревский / Facebook.
Муаллиф ўз асарини икки тилда — рус ва украин тилларида қисқача изоҳлади: «Кто прав или нет, зависит, с какой стороны смотреть. Хто правий чи ні, залежить з якого боку дивитися» («Кимнинг ҳақ ёки ноҳақ экани қайси томондан қарашга боғлиқ»).
Фото: Евгений Скляревский / Facebook.
«Газета.uz» рассомдан суратга изоҳ беришини сўраганда, қисқача қилиб: «Ҳар кимнинг ўз ҳақиқати борлигини айтмоқчи бўлдим», — дея жавоб берди. Шунингдек, у: «Ва мен тинчлик тарафдориман», дея қўшимча қилди.
Қолган Inkuzart асарлари каби янги ижод иши ҳам Чилонзор туманида (1-квартал) жойлашган. У худди шу рассомнинг «Умид кўзи» номли эски иллюстрациясининг ўрнида пайдо бўлди.
Фото: Евгений Скляревский / Facebook.
«[Асар] уруш билан боғлиқ жамиятдаги келишмовчиликни аниқ тасвирлаб беради. Бу жанжал барча оилалар ва турли жамоалар, жамият, ташқаридаги қизиқувчилар ва қўшнилар орқали ўтди», — дея изоҳ берди «Письма о Ташкенте» («Тошкент ҳақида мактублар») сайти раҳбари Евгений Скляревский.
