Тошкентнинг «Ҳумо» ҳоккей клуби икки йиллик танаффусдан кейин яна Қозоғистон Про лигасида иштирок этади. Бу ҳақда Ўзбекистон хоккей федерацияси матбуот хизмати хабар берди.
Маълум қилинишича, «Ҳумо» ҳоккей клуби Ўзбекистон хоккей федерацияси билан келишувга эришган. Яқин келажакда Қозоғистон Про лигасида қатнашиш бўйича битим ва меъёрий ҳужжатлар тузилади. Жамоа Қозоғистон кубогида иштирок этишни ҳам режалаштирган.
«Умид қиламанки, бу Ўзбекистон ва Қозоғистон хоккей мухлисларини хурсанд қилади. Қозоғистон чемпионатида маҳоратли жамоалар йиғилган, умуман олганда даража юқори. Ишончим комилки, «Ҳумо»нинг турнирдаги иштироки мамлакатимизда хоккейнинг оммавийлашуви ва ривожига хизмат қилади», — деди Ўзбекистон хоккей федерацияси биринчи вице-президенти Баҳодир Ғафуров.
Эслатиб ўтамиз, Тошкентнинг «Ҳумо» ҳоккей клуби 2019/20 йилги Қозоғистон чемпионатида қатнашиб, 10-ўринни эгаллаганди.
Маълумот учун, 2019 йил Ўзбекистон тарихида илк маротаба хоккей бўйича мамлакат чемпионати бўлиб ўтди. Чемпионатнинг финал беллашувида «Семурғ» жамоаси «Бинокор» устидан ғалаба қозонган ҳолда хоккей бўйича биринчи Ўзбекистон чемпионига айланганди.
