Сурхондарё вилоятида At Termiziy University номи остида сохта университет ташкил қилингани аниқланди, деб хабар берди Бош прокуратура ҳузуридаги Иқтисодий жиноятларга қарши курашиш Департаменти.
Таъкидланишича, мазкур ҳолат Таълим сифатини назорат қилиш давлат инспекциясининг мурожаатига асосан ўтказилган терговга қадар текширувда аниқланган.
Мазкур универистетнинг Telegram-каналидаги маълумотларга кўра, муассасада IT, бошланғич таълим, иқтисодиёт, тарих, педагогика ва психология йўналишларида таълим беришга мўлжалланган. Қабул эса 10 майга қадар имтиҳон ва суҳбат асосида ўтказилгани, 1−2 курслар учун контрак миқдори (сиртқи-онлайн) 8 млн 220 минг сўм, (сиртқи) 9 млн 864 минг сўм этиб кўрсатилган.
Эътиборлиси, каналнинг ўзида университет лицензияга эга эмаслиги, рухсатнома тез кунларда олиниши қайд этилган. Қолаверса, университетда ўқиш тегишли лицензия олингач бошланиши ҳақида ҳам эълон берилган.
Бош прокуратура маълум қилишича, М.Ж. ва С.С. исмли шахслар ўзаро тил бириктириб, «U.A.» МЧЖни ташкил этиб, сўнгра Telegram тармоғида At Termiziy University хусусий университети каналини очишгани айтилмоқда.
«Фаолият юритишига тегишли рухсатнома олинмаган университетга ўқишга қабул бошланганлиги ҳақида хабарлар беришади. Улар ушбу университетда ўқиш истагини билдирган 73 нафар фуқаронинг 306,9 млн сўмини тўлов пуллари сифатида қабул қилиб олганликлари аниқланди», — дейилади хабарда.
Гумондорларга нисбатан Жиноят кодексининг 168-моддаси (фирибгарлик) жиноят иши қўзғатилди. Ҳозирда тергов ҳаракатлари ўтказилмоқда.
