Давлат активларини бошқариш агентлиги «Давлат кўчмас мулк объектларини ҳоким ёрдамчиларининг онлайн-буюртманомасига асосан тўғридан тўғри электрон онлайн-аукцион савдоларига чиқариш тартибини тасдиқлаш ҳақида»ги ҳужжат лойиҳасини жамоатчилик муҳокамаси учун эълон қилди.
Унга кўра, майдони 2000 кв. метргача бўлган бўш турган давлат кўчмас мулки объектлари ҳоким ёрдамчилари онлайн-буюртманомасига асосан тўғридан тўғри электрон онлайн-аукцион савдоларига чиқарилади.
Бунда онлайн-буюртманома ҳоким ёрдамчилари томонидан Давлат активларини бошқариш агентлиги «Давлат мулки» ахборот тизими орқали юборилади.
Ҳоким ёрдамчилари онлайн-буюртманомаларига асосан давлат кўчмас мулк объектлари мувофиқ схема бўйича электрон онлайн-аукцион савдоларига чиқарилади. Давлат кўчмас мулки объектларини сотиш шартлари, агар президент, Вазирлар Маҳкамаси ёки Давлат мулкини сотишда тендер савдоларини ўтказиш бўйича давлат комиссияси қарорларида бошқача қоида белгиланмаган бўлса, сотувчи томонидан белгиланади.
Ҳоким ёрдамчиси ўзи бириктирилган маҳаллада аниқланган бўш турган давлат кўчмас мулк объектини сотиш учун ахборот тизими орқали онлайн-буюртманома беради.
Ҳоким ёрдамчисининг онлайн-буюртманомасида бўш турган давлат кўчмас мулк объекти бўйича қуйидаги маълумотлар илова қилинади:
- объектнинг тўлиқ манзили;
- фото суратлари ва аниқ геопозицияси;
- объектни келгусида сотиш бўйича таклифи.
Шунингдек, буюртма ҳоким ёрдамчиси томонидан электрон рақамли имзо билан тасдиқланади.
Ахборот тизимига онлайн-буюртманома келиб тушгандан сўнг Агентликнинг ҳудудий бошқармалари томонидан 3 иш куни давомида:
- кўчмас мулк объектининг бўш турганлиги;
- кадастр ҳужжатларига мувофиқ объектнинг умумий ер майдони ва бино-иншоотлар эгаллаган майдони ҳамда балансда сақловчи;
- бўш турган кўчмас мулк объектининг ижтимоий соҳа объекти тоифасига кириши ёки кирмаслиги;
- бўш турган кўчмас мулк объектининг Ўзбекистон президенти, Вазирлар Маҳкамаси, Қорақалпоғистон Вазирлар Кенгаши, вилоятлар ва Тошкент шаҳар ҳокимликларининг Ҳудудларни ривожлантириш дастури (тармоқ жадвали)да мавжудлиги ёки йўқлиги;
- хусусийлаштириш дастурларига кирганлиги, объектдан келгусида самарали фойдаланиш бўйича ваколатли органнинг қарори мавжудлиги;
- объектга нисбатан тақиқ (чеклов)нинг мавжудлиги ўрганилади;
- бўш турган кўчмас мулк объекти жойига чиққан ҳолда кўздан кечирилади.
Ҳужжат лойиҳаси муҳокамаси 28 июнгача давом этади.
Аввалроқ, қишлоқ хўжалигига мўлжалланган ерларни ижарага бериш соддалаштирилгани ҳақида ёзган эдик.
