Ҳукуматнинг 6 майдаги қарорига кўра, қишлоқ хўжалигига мўлжалланган ерларни ижарага бериш учун такроран ўтказилган танловда ғолиб аниқланмаса, ушбу ерларнинг майдони, ихтисослиги ўзгартирилиб бошқа йўналишларга очиқ танлов ўтказилади. Шунингдек, танловга чиқарилган ерни олмоқчи бўлган талабгорлар 1 мартдан кейин хориждан келган меҳнат мигрантлари бўлса, закалат пули тўлашдан озод этилади. Бу ҳақда Адлия вазирлиги хабар берди.
Белгиланишича, вилоят ҳокимликлари Қишлоқ хўжалиги вазирлиги билан такроран танловда ҳам ғолиб аниқланмаган ерлар бўйича унинг майдони, ихтисослигини ўзгартириб талаб юқори бўлган бошқа йўналишларга очиқ танлов ўтказади.
Фуқаролардан ерни танловга чиқариш бўйича таклифларни кўриб чиқиш учун 3 иш кунида таклиф тушган ерни ўрганади. Илгари 5 иш кунида эди.
Шунингдек, танловга чиқариш учун мўлжалланган ерни ваколатли органлар билан келишиш муддати ҳам 5 кундан 3 кунга қисқартирилди.
Танловга чиқарилган ерни олмоқчи бўлган талабгорлар 2022 йил 1 мартдан кейин хориждан келган меҳнат мигрантлари бўлса, БҲМнинг 1 баравари (270 минг сўм) миқдоридаги закалат пулини тўлашдан озод этилади. Илгари мазкур имтиёз фақат ижтимоий дафтарларга киритилганларга татбиқ этилган. Эслатиб ўтамиз, бу устуворлик президентнинг 24 март кунги фармонида назарда тутилган эди. Ушбу фармон билан қишлоқ хўжалигига мўлжалланган ерларни ижарага беришда очиқ электрон танлов натижаларини олишда ҳоким қарори талаб қилинмаслиги белгиланган.
