Хонанда Наргиз Зокирова Тошкентдан Москванинг Домодедово аэропортига учиб бориши билан қўлга олинди. Хонанда Россиянинг Украинага бостириб киришини танқид қилгани учун Ўзбекистонга қайта депортация қилиниши кутилмоқда, дея маълум қилди унинг адвокати Бахром Исмоилов StarHit нашрига, деб ёзмоқда «Коммерсантъ».

Адвокатнинг сўзларига кўра, у ҳуқуқ-тартибот идораларидан тегишли қарорни қабул қилиб олган, унга кўра хонанданинг 2072 йилгача Россия Федерациясига кириши тақиқланган.

«Менда 50 йилга киришни тақиқлаш тўғрисидаги қарор бор. Бу махсус операцияни қоралаган жамоат арбоблари оладиган стандарт тақиқ. Бу чеклов Наргиз Зокировага ҳам қўйилган. Наргиз бунга тайёр эди. У бундай чоралар кўрилишини тахмин қилганди. Шунга қарамай, васийлигимдаги ўзининг фуқаролик позициясига содиқ қолади», — деди Исмоилов нашрга қарор нусхаси билан ўртоқлашар экан.

Наргиз Зокирова Украинадаги урушга қарши бир неча бор очиқ гапирган. Мисол учун, 22 апрель куни хонанда ўзининг Телеграм-каналида: «Украинадан қўлларингни торт! Украина халқини ўлдирган, йўқ қилган, зўрлаган ва талон-торож қилган ҳар бир кишига лаънат бўлсин! Йўқолсин уруш!» — деб ёзди.

«Дарё»нинг ёзишича, хонанданинг амакиваччаси Жавоҳир Зокиров депортацияга Наргиз Россиянинг Украинага бостириб кириши ҳақидаги фикрлари сабаб бўлганини билдирди. Қариндошининг айтишича, у Наргизни ижтимоий тармоқларда ҳеч нарса эълон қилмасликка чақирган, лекин у огоҳлантиришларига эътибор бермаган. Унинг сўзларига кўра, шу туфайли у ҳатто синглиси билан ижодий ҳамкорликни ҳам тўхтатган.

Адвокатнинг сўзларига кўра, хонанда АҚШ фуқаролигига эга. У Ўзбекистонда туғилган ва 1995 йилда оиласи билан АҚШга кўчиб ўтган. 2013 йилда у Россиянинг «Голос» шоуси финалчиси бўлди, шундан сўнг у РФда фаолият кўрсатди. 2019 йилда мусиқа продюсери Максим Фадеев хонандани Россияга нафратда айблади, у бу айбловларни рад этди. Россиянинг Украинага бостириб кириши бошланганидан сўнг хонанда Ўзбекистонга қайтганини маълум қилди.