Украинанинг биринчи президенти Леонид Макарович Кравчук узоқ давом этган касалликдан сўнг 10 май куни 88 ёшида оламдан ўтди. Бу ҳақда унинг оила аъзолари даврасидаги манбасига таяниб, «Українські Новини» нашри хабар берди.
Леонид Кравчук 1991−1994 йилларда Украинага президентлик қилган. 1991 йилда Украина номидан у РСФСР президенти Борис Ельцин ва Белорусия Олий Кенгаши раиси Станислав Шушкевич билан СССРнинг мавжудлигини тугатиш тўғрисида Беловежск келишуви имзолаганди.
Леонид Кравчукнинг шахсий сайти маълумотларига кўра, 1991 йил 1 декабрда бўлиб ўтган Украина тарихидаги биринчи президентлик сайловларида 61,6% овоз билан биринчи турда ғолибликни қўлга киритган.
1992 йил 26 февралда Финляндия пойтахти Хельсинкида Украинани Европа билан интеграция қилувчи якуний актга имзо чеккан.
1994 йилнинг июнида ўтказилган президентлик сайловларида 45% овоз тўплаб, Леонид Кучмега ютқазиб қўйган.
2020 йилнинг июлида у Донбасдаги вазиятни тинч йўл билан ҳал қилиш бўйича Учтомонлама алоқа гуруҳидаги Украина делегациясига раҳбарлик қилди.
