24 март куни қишлоқ хўжалигига мўлжалланган ер участкаларини ижарага бериш тартибини соддалаштириш чора-тадбирлари тўғрисидаги (91-сонли) президент фармони қабул қилинди. Бу ҳақда Адлия вазирлиги хабар қилди.

Унга кўра, эндиликда қишлоқ хўжалигига мўлжалланган ерларни ижарага беришда очиқ электрон танлов натижаларини олишда ҳоким қарори талаб қилинмайди.

Илгари ижара шартномаси тузилмасдан аввал ҳоким қарори қабул қилиниши керак эди.

Шунингдек, деҳқон хўжалиги юритиш учун ер участкаларини очиқ электрон танлов орқали ижарага беришда 1 мартдан кейин хориждан қайтиб келган меҳнат мигрантларига алоҳида устуворлик берилади.

Маълумот учун, 2019 йилда Қорақалпоғистон Республикаси Вазирлар Кенгаши раиси, ҳокимларнинг аукцион ғолиби номига ер участкасини ажратиш бўйича қарор қабул қилиши тўғрисидаги талаб бекор қилиниши ҳақида президент қарори қабул қилинган эди.

Шунингдек, президент 4 июндаги йиғилишда ҳоким қарори билан нодавлат секторга ер ажратиш ҳамда ерларни тўғридан-тўғри ва текинга бериш амалиёти бекор қилинишини маълум қилганди.