Ўзбекистон Фавқулодда вазиятлар вазирлиги 20 апрель куни республиканинг айрим ҳудудларида кучли ёғингарчилик натижасида юзага келган сел оқимлари ва тошқин сувлари оқибатлари ҳақида маълумот берди.
ФВВнинг Гидрометеорология хизмати марказига таяниб хабар қилишича, 20 апрель куни Самарқанд ва Жиззах вилоятларида 1,5 соатда ёғиб ўтган ёмғир бир ойлик ёғингарчилик миқдорини ташкил этган.
Ушбу гидрометеорологик ҳодисаларни бартараф этишда амалий ёрдам сўраб, аҳоли томонидан Фавқулодда вазиятлар вазирлиги, унинг ҳудудий бошқармалари ва таркибий тузилмаларининг «101», «1050» ва бошқа тезкор рақамларига ёмғир сувларини тортиш, об-ҳаво тўғрисида маълумотлар олиш ва бошқа масалаларда Самарқанд вилоятидан 222 та, Жиззах вилоятидан 14 та, Навоий вилоятидан 10 та, Қашқадарё вилоятидан 1 та жами 280 дан ортиқ мурожаат келиб тушган. Барча мурожаатлар бўйича, жумладан, сел оқимлари, сув тошқинлари ва уларнинг оқибатларини бартараф этиш учун ёнғин-қутқарув бўлинмаларидан 92 та махсус техника, 20 та мотопомпа ҳамда 758 нафар қутқарувчи жалб этилди.
Ёмғир ва оқава сувлари Самарқанд шаҳрининг 5 та шох кўчасидан ўтувчи автомобиллар қатнов қисмида, 54 та ички кўчалар атрофидаги ирригация тармоқларида, 20 дан ортиқ кўп қаватли уйларнинг ертўлалари ва атрофида, 84 та якка тартибдаги турар жой биноларининг ертўлалари ва ҳовлиларида, 5 та умумтаълим (9, 29, 39, 75-сон умумталим, 1 та ихтисослашган) мактаблар ва M.Улуғбек кўчасидаги «Кўзмунчоқ» номли МТМ ҳовлилари ҳамда Нарпай кўчасидаги «Муз саройи» биноси остидаги автотураргоҳда тўпланган.
Ёмғир сувлари Самарқанд туманининг 4 та МФЙида кузатилиб, Булунғур тумани «Ғубдин» қишлоғи ҳудудидан ўтувчи М-39 «Алмати-Бишкек-Тошкент-Шаҳрисабз» автомобиль йўлининг 1046-километрида ўрнатилган д=1500 сув ўтказиш қувурига сиғмасдан, йўл қатнов қисмининг бир томонида йиғилиб қолган. Юзага келган ҳолат оқибатларини бартараф этиш мақсадида, ёнғин-қутқарув бўлинмаларидан 144 нафар шахсий таркиб, 17 та ёнғин-қутқарув техникаси, 11 та мотопомпа ҳамда «Самарқанд сув таъминот» МЧЖдан 6 та махсус техника, 14 нафар ишчи-ходим жалб қилинди.
Жиззах вилояти Фориш туманининг тоғли ҳудудлари ва адирликларида кузатилган кучли ёғингарчилик натижасида содир бўлган сел оқими «Эгизбулоқ» МФЙда жойлашган 260 та хўжаликдан ўтиб, уларнинг 53 таси тўлиқ талофат кўрган, 44 таси ўрта ва 163 таси енгил даражада талофат кўрган. Қутқарувчилар томонидан 6 нафар фуқаро сел оқимлари ичидан қутқарилиб, Фориш тумани тиббиёт бирлашмасига ётқизилган. Ушбу ҳудудда шундай сел оқимлари бундан тахминан 80 йиллар аввал кузатилган.
Сел оқими 15-сон умумтаълим мактаби ва 9-сон мактабгача таълим муассасаси ҳудудига (биноларнинг 1-қаватига) ҳам кирган. 1,5 км ички йўлларга сел сувлари тошиши оқибатида транспорт воситалари ҳаракати вақтинчалик тўхтатилган.
Юзага келган сел оқими натижасида «Эгизбулоқ» МФЙда жойлашган 25 та хўжаликда истиқомат қилувчи 100 дан ортиқ фуқаролар вақтинчалик яшаш учун яқин қариндошларининг уйларига кўчириб ўтказилиб, улар учун туман ҳокимлиги томонидан ҳаётий зарур маҳсулотлар захираси ташкил этилди.
Содир бўлган фавқулодда вазиятлар оқибатларини бартараф этиш ишларига жами 520 нафар ҳуқуқни муҳофаза қилувчи органлари ходимлари, вилоят ва туман ҳокимлиги масъул раҳбарлари, ФВДТнинг ҳудудий ва қуйи тизимлари хизматлари ишчи-хизматчилари ҳамда 54 та махсус техника жалб этилди.
Қашқадарё ва Навоий вилоятларида сел оқимлари ўз йўлидан оқиб ўтган. Сел ҳудудлардаги аҳоли яшаш хонадонлари ва бошқа ижтимоий соҳа объектларига зиён етказмаган.
Ҳодиса оқибатларини бартараф этиш ишлари Фавқулодда вазиятлар вазирлиги раҳбарияти назорати остида давом эттирилмоқда.
Ижтимоий тармоқларда сел оқибатида автомобиллар, чорва моллари ва бошқа мол-мулкларга жиддий зарар етгани акс этган видео ва фотосуратлар тарқалди. Кўрилган зарарнинг умумий миқдори ҳақида маълумот берилганича йўқ. Шу билан бирга, 20 апрель куни табиий офат натижасида Жиззах вилояти Фориш туманида, дастлабки маълумотларга кўра, 4 киши (1 эркак ва 3 аёл) сув оқизиб кетиши натижасида ҳалок бўлгани хабар қилинди.
