Франциянинг амалдаги президенти Эммануэль Макрон 10 апрель куни бўлиб ўтган президентлик сайловининг биринчи турида 27,6 фоиз овоз билан ғалаба қозонди, дея хабар қилди Le Monde нашри.
Иккинчи ўринни эса 23,41 фоиз овоз билан ўта ўнгчи «Миллий бирлик» партияси номзоди Марин ле Пен эгаллади. Президентлик пойгасида учинчи ўринни 21,95 фоиз овоз билан чап қанот «Бўйсунмас Франция» партияси вакили Жан-Люк Меленшон эгаллади.
Президентлик пойгасида жами 12 та партия иштирок этди. DW хабарига кўра, анъанавий партиялар — социалист ва консерваторлар вакиллари тарихий муваффақиятсизликка дуч келишди. Франция социалистик партияси вакили бўлган Париж мэри Анн Идальго 1,7 фоиз, ўнг марказчи Республикачилар партиясидан номзод Валери Пекресс 4,75 фоиз овоз олган.
Социологлар башорат қилганидек, сайловнинг биринчи босқичида сайловчиларнинг фаоллиги нисбатан паст бўлди. Соат 17:00 да 65 фоиз сайловчи овоз берди, бу 2017 йилдаги сайловга нисбатан деярли тўрт ярим фоизга (69,42 фоиз), 2012 йилдагидан (70,59 фоиз) беш ярим фоизга кам.
Президент сиёсати танқидчилари Франция аҳолиси Макроннинг энергия нархи ошиши ва инфляция фонида олиб бораётган иқтисодий сиёсатидан норози эканига ишора қилмоқда. Шунингдек, Макроннинг марказчи «Олға, Республика!» партияси 2021 йил ёзида бўлиб ўтган минтақавий сайловларда мағлубиятга учради ва июнь ойида бўлиб ўтадиган парламент сайловларида ҳам овозларни йўқотиши мумкин.
Марин ле Пен эса Россиянинг Украинага нисбатан ташқи сиёсатига юмшоқ баҳо бериш ва Владимир Путиннинг Қримдаги сиёсатини қўллаб-қувватлашда айбланмоқда.
24 апрель куни бўлиб ўтадиган президентлик сайловининг иккинчи турида Эммануэль Макрон ва Марин Ле Пен иштирок этади.
