Москванинг Лефортово суди Покров колониясидаги сайёр йиғилишида россиялик мухолифатчи Алексей Навальнийга 9 йиллик қамоқ жазоси белгилади. Бу ҳақда «Новая Газета» нашри хабар берди.
Навальний суд томонидан «фирибгарлик» ва «судни ҳақоратлаш»да айбдор деб топилди. Мухолифатчи жазони оғир режимдаги колонияда ўтайди. Шунингдек, у 1,2 млн рубль миқдорида жарима тўлаши ҳам керак бўлади.
Навальний суд иши доирасида 2018 йилги сайловолди компанияси ва Коррупцияга қарши курашиш жамғармаси фаолиятини қўллаб-қувватлаш учун қилинган хайрия маблағларининг «талон-тарож» қилинганлиги бўйича айбланган эди. Судни ҳақорат қилганлик бўйича иш эса 2021 йилда Навальний суд жараёнида жаҳон судьяси, прокурор ва Иккинчи жаҳон уруши фахрийсининг невараси Игнат Артеменкони ҳақорат қилганлиги бўйича эди.
«Новая Газета» нашри ўз мухбирига таяниб, маълум қилишича, Навальнийнинг адвокатлари Ольга Михайлова ва Вадим Кобзев полиция томонидан ушланган. «Улар автозакка ўтирғизилди ва олиб кетилди», — дейилади хабарда.
Ҳозирда Навальний «Ив Роше» иши бўйича 3,5 йиллик озодликдан маҳрум қилиш жазосини ўтамоқда.
Алексей Навальний 2020 йилнинг август ойида заҳарланиб (у Россия Федерал хавфсизлик хизмати ходимларини айблаган) ва Германияда даволаниб, Москвага келганида ҳибсга олинган эди.
Навальний ҳибсга олингандан сўнг Коррупцияга қарши кураш фонди Путиннинг Геленджик яқинидаги «саройи», у камида 100 млрд рублга қурилгани ҳақида фильм чиқарган эди. Президент Владимир Путин сарой унга тегишли эмаслигини айтган. Путиннинг бизнесмен дўсти Аркадий Ротенберг ушбу мажмуанининг эгаси эканлигини маълум қилиб, саройни апарт-меҳмонхона деб атади.
