Сенатнинг 24-ялпи мажлисида «Ўзбекистон Республикасининг Фуқаролик кодексига қийноққа солишдан жабрланганларга етказилган зарарни қоплаш тартибини такомиллаштиришга қаратилган қўшимчалар киритиш тўғрисида»ги Ўзбекистон Республикасининг Қонуни муҳокама қилинди. Бу ҳақда парламент юқори палатаси ахборот хизмати хабар берди.
Маълум қилиниши, мажлисда қийноққа солишдан жабрланганларга ижтимоий, ҳуқуқий, психологик ва тиббий ёрдам кўрсатилиши ҳамда уларга етказилган зарарнинг компенсация қилинишини таъминлаш, бунда қийноқдан жабрланган шахсларга етказилган жисмоний ва руҳий зарар, моддий зарар ёки бой берилган фойда, маънавий зарар, юридик ёрдам, дори воситалари ва тиббий хизмат, психологик ва ижтимоий хизматлар учун қилинган харажатлар тўлаб берилиши таъкидланди.
Шунингдек, Ўзбекистон БМТнинг Қийноқларга қарши конвенциясини 1995 йилда ратификация қилгани, мазкур қонун билан инсон ҳуқуқ ва эркинликлари соҳасида, шу жумладан, қийноқларга йўл қўймаслик учун зарур ташкилий-ҳуқуқий шарт-шароитларни яратишга доир халқаро мажбуриятларини бажариш йўлида тизимли, изчил ва босқичма-босқич чора-тадбирларни давомий амалга ошириб келинаётганлиги маълум қилинди.
Бундан ташқари, мажлисда президентнинг 2021 йил 22 февраль куни БМТ Инсон ҳуқуқлари бўйича кенгаши 46-сессиясида миллий превентив механизмни такомиллаштириш БМТнинг Қийноқларга қарши конвенцияси Факультатив протоколининг Ўзбекистон томонидан ратификация қилинишининг амалий натижаси экани таъкидланган.
Қонун сенаторлар томонидан маъқулланди.
Маълумот учун, ўтган йили декабрда депутатлар қийноқлардан жабрланганларга товон пули тўлашни назарда тутувчи Фуқаролик кодексига ўзгартиришлар киритиш тўғрисидаги қонун лойиҳасини биринчи ўқишда маъқуллаган эди.
