14 март куни кечки пайтда Россиянинг «Первый канал» телеканали ходими, муҳаррир Марина Овсянникова жонли эфир вақтида урушга қарши баёнот билан чиқди. Meduza нашрининг ёзишича, ҳолат Москва вақти билан соат 21:35 да «Время» дастури бошловчиси Екатерина Андреева ғарб санкцияларига қарши чора-тадбирларга оид лавҳа учун кириш сўзини ўқиётганда содир бўлган.
Видеолардан Марина Овсянникова кадрда «Урушни тўхтатинг. Пропагандага ишонманг. Бу ерда сизни алдашмоқда. Russians against war (Россияликлар урушга қарши — тарж.)» ёзувли плакат билан кўриниш берган.
У бир неча маротаба «Урушни тўхтатинг» деб такрорлаган, шундан сўнг бошловчининг гапи якунланмаса-да, санкциялар ҳақидаги репортажга ўтиб кетилган. Шундан сўнг, полициячилар Маринани Москванинг Останкино тумани ички ишлар бўлимига олиб кетишган.
Марина Овсянникова шу куни видеомурожаат билан ҳам чиққан эди. «Ҳозир Украинада содир бўлаётган нарсалар жиноятдир. Россия тажовузкор мамлакат. Бу тажовуз учун жавобгарлик фақат бир инсоннинг бўйнида, у ҳам бўлса Владимир Путин. Менинг отам украин, онам эса рус ва улар ҳеч қачон бир-бирига душман бўлмаган», — деди у.
У шунингдек, бўйнидаги маржон Россия биродарлар қотиллиги урушини дарҳол тўхтатиши кераклигининг рамзи эканлиги таъкидлаб, қардош халқлар ҳали ҳам ярашиши мумкинлигини айтди.
Фото: Видеодан лавҳа.
«Афсуски сўнгги йилларда «Первый канал»да ишлаб, Кремль пропагандаси билан шуғулланганман ва бунинг учун ҳозир жуда ҳам уяламан. Телевизор экранидан ёлғон гапиришга, рус халқини зомбига айлантиришга рухсат берганимдан уяламан. Биз 2014 йилда буларнинг бари энди бошланганда сукут сақладик… Биз ушбу ғайриинсоний режимни фақатгина жимгина томоша қилдик. Ва ҳозир биздан бутун дунё юз ўгирди. Ва бизнинг яна 10 та авлодимиз бу биродар қотиллиги уруши шармандалигини юва олмайди», — деди Марина Овсянникова.
Украина президенти Владимир Зеленский муҳаррир Марина Овсянниковага миннатдорчилик билдирди. «Мен ҳақиқатни етказишдан тўхтамаётган, дезинформация билан курашаётган ва ҳақиқатни айтаётган, дўстлари ва яқинларига реал фактларни гапириб бераётган россияликларга ва шахсан „Первый канал“ студиясида урушга қарши плакатни кўтариб чиққан қизга миннатдорчилик билдираман», — деди Зеленский.
ТАСС нашрининг хабар беришича, Марина Овсянниковани қўлга олишган, унга нисбатан Маъмурий жавобгарлик тўғрисидаги кодекснинг 20.3.3 моддаси бўйича (Россия Қуролли Кучларини обрўсизлантирганлик учун) баённома тузилган. «Первый канал» эса «жонли эфир вақтида кадрда бегона одам пайдо бўлиши юзасидан хизмат текшируви ўтказишни бошлаган.
Мазкур ҳолат Ўзбекистон жамоатчилик вакиллари эътиборидан ҳам четда қолмади. Хусусан, кимдир ижтимоий тармоқларда шунчаки видео билан бўлишган бўлса, кимдирлар вазиятга ўз наздида изоҳ ҳам бериб ўтди.
Журналист, блогер Муҳрим Аъзамхўжаев Марина Овсянниковани «мард аёл» деб атади.
«Ҳодиса видеосини қайта-қайта кўрарканман, миямда фақат бир савол айланяпти: қандай қилиб қўрқмади экан? Қўрқувни қандай қилиб енгди экан? Қўрқмаслик учун қандай одам бўлиш керак ўзи?», — деди у.
У «Новая газета» бош муҳаррири, Нобель мукофоти соҳиби Дмитрий Муратов ва фаолияти тугатилган «Эхо Москвы» бош муҳаррири Алексей Венедиктов интервьюларини кўраётганида ҳам шу савол тинчлик бермаганини таъкидлади.
«Булар нега қўрқмайди? Йўқ, тўғри, Муратов ҳам эски бир гапни такрорлабди: „Аҳмоқларгина қўрқмайди“, деб. Тушунмайдиганим шу-да: қўрқса, унда қандай қилиб четдан қараганда қўрқинчли кўринадиган ҳозирги (ҳақиқатни айтиш) ишини давом эттираверади? Қаердан куч олади?», — дея савол билан юзланган Муҳрим Аъзамхўжаев.
Davletovuz эса Россиянинг биринчи каналидаги ушбу вазиятни «ҳақиқат учун курашувчи ҳамма жойда топилади», дея қисқа қилиб изоҳлаган.
Ular лойиҳаси муаллифи Лазиз Ҳамидов Twitter`да «Путинга аллақачон ҳамма қарши, хатто ўз пропагандаси ҳам», деб ёзган.
Иқтисодчи Отабек Бакиров шундай деди: «Мияси заҳарланган, зомбига айланган, фақат тақдим этилган шаблонни қабул қилиш даражасига тушганлар учун ҳеч бир рационал чора, танқидий фикрлашга ундаш, соғлом ақлга мурожаат амал қилмайди». Унинг қўшимча қилишича, «бу ҳам эволюция. Фақат антиэволюция. Турларнинг танланиши».
