Тадбиркор Рауф Комилжонов 24 февраль куни бўлиб ўтган биржа савдоларида «Савдогарбанк»нинг қўшимча 45,73 фоизлик улушини сотиб олди.
Олтита битим давомида акциядор банкнинг 594,53 миллион дона қимматли қоғозларини 71,3 млрд сўмга — ҳар бир акция учун 120 сўмдан сотиб олди.
Ноябрь ойи охирида Рауф Комилжонов «Савдогарбанк»нинг 53,53 фоиз акциясини 83,5 млрд сўмга сотиб олди.
Яқинда амалга оширилган операцияларни ҳисобга олсак, энди у кредит ташкилотининг 99,26 фоиз акцияларига эгалик қилади. Илгари банк акциядорлари Сингапурнинг Megastrata PTE (30 фоиз), Самарқанд чой қадоқлаш фабрикаси (12,6 фоиз) ва бошқа жисмоний шахслар (3,9 фоиз) эди.
2021 йил III чораги якунларига кўра, «Савдогарбанк» 10,8 млрд сўм миқдорида зарар кўрган, бироқ 2020 йилда банкнинг соф фойдаси 14,2 млрд сўмни ташкил қилган.
Корхона ва ташкилотлар ягона реестри маълумотларига кўра, Рауф Комилжонов Darvoza Savdo’нинг (Макро дўконлар тармоғи) 11 фоиз, Profit Store’нинг (энг йирик озиқ-овқат дистрибютори) 20 фоиз ва Ramirus Gas Servic’нинг (ихтисослаштирилган корхоналарда мотор ёқилғиси чакана савдоси) 2,8 фоиз улушига эгалик қилади.
