Айни вақтда Шавкат Мирзиёев Қорақалпоғистоннинг Беруний туманида қуввати 100 МВт бўлган шамол электр станцияси қурилишига тамал тошини қўйиш маросимида иштирок этмоқда. Бу ҳақда блогер Азиза Қурбонова хабар берди.
Президент маросимда нутқ сўзлаб, Ўзбекистон иқтисодиёти ва мудофаасини мустаҳкамлаш кераклигига тўхтатиб ўтди.
«Дунё кун сайин эмас, соат сайин таҳликали бўлиб боряпти. Биз иқтисодиётимиз, мудофаамизни мустаҳкам қилиб, ишонч билан жонажон ватанимизнинг қудратини кўтаришга ҳаракат қилишимиз керак», — деди Шавкат Мирзиёев.
У шунингдек, ерлардан унумли фойдаланилмаётганини танқид қилган.
«Қорақалпоғистон ери 2 миллион халқни бемалол боқа олади. Нима қилиш керак? Ақл ва изланиш билан, инновация билан ундан фойдаланиш керак. Қорақалпоғистоннинг ҳавоси ҳам фойда бериши аниқ. Неча йиллар давомида бу ер энергетика танқислигини бошдан кечиряпти. Нега биз бунга кўп эътибор беряпмиз? Агар биз катта корхоналар қурмоқчи бўлсак, келадиган инвестор ҳам инфратузилманг борми, газинг, сувинг, йўлинг, темир йўлинг, аэропортинг борми деб сўрайди. Коррупция бўлмайдими, деб савол беради», — деди давлат раҳбари.
Президент Саудия Арабистонининг «ACWA Power» компанияси 20га яқин етакчи компаниялар ўртасида ўтган танловда 1 кВт/соат электр энергияси учун 2,57 АҚШ центи тариф таклифи билан ғолиб деб топилганини адолатли ва рақобат билан бўлганини қўшимча қилган.
Маълумот ўрнида, «ACWA Power» компанияси Беруний туманида 100 МВт қувватли янги шамол электр станциясини қуради. Мазкур электр станция 2024 йилда ишга туширилиши кутилмоқда ва у йилига 350 миллион кВт-соат электр энергияси ишлаб чиқариб, 120 мингдан ортиқ хонадонни электр энергияси билан таъминлайди. Бунинг натижасида 106 миллион куб метр табиий газ тежалишига эришилади, ушбу ҳажмдаги тежалган газ билан 35 мингта хонадонни 1 йил давомида табиий газ билан таъминлаш мумкин.
