Ўзбекистон президенти Шавкат Мирзиёев 18 февраль куни Янгиҳаёт туманига ташрифи чоғида ушбу туманда қурилиши режалаштирилган «Янгиҳаёт» индустриал технопарки майдонида бўлди. Президент чиқишининг бир қисми «Ўзбекистон 24» телеканалида «Менимча» кўрсатувида намойиш этилди.
«Янгиҳаёт» индустриал технопаркини ташкил этиш президентнинг 2021 йил 4 февралдаги қарорида кўзда тутилган.
Давлат раҳбари матбуот хизмати маълумотларига кўра, ушбу мажмуа учун 210 гектар майдон ажратилган. Шундан 150 гектари икки босқичда аукцион савдоларига чиқарилади. Тадбиркорлар сотиб олинган ернинг мулкдори бўлади ва корхоналарни ўзлари қуради. Қолган 60 га ер қандай усулда тақсимланишига аниқлик киритилмаган.
Президент Тошкент ҳокими Жаҳонгир Ортиқхўжаев ва инвестициялар ва ташқи савдо вазирининг биринчи ўринбосари Азиз Воитовдан ерларни ажратишда таниш-билишчилик бўлмайдими, деб сўради. «Тадбиркорлар ҳаммаси таниш-билиш бўлиб кетибди бу ерда (демайдими), Воитовнинг ўзи (ерларни) берибди, деган гап чиқиб кетмайдими?», — деди Шавкат Мирзиёев.
Ҳоким ва вазирнинг биринчи ўринбосари бир овозда технопаркдаги ер майдонлари «фақат аукцион орқали ажратилади», деб жавоб қайтаришди.
Шавкат Мирзиёев айрим тадбиркорлар ерлар тақсимланиб бўлинган, деган хаёлга борса, ушбу лойиҳага қизиқиш йўқолишини таъкидлади. Раҳбарлар бундай ҳолатга йўл қўйилмаслигини билдиришди.
Давлат раҳбари пойтахтда ер камайиб бораётгани, келажакда бу сингари майдонлар қолмаслигини айтди. Президент ер ресурсидан самарали фойдаланиш кераклигини, қўшқаватли корхоналар қуриш вақти аллақачон келганини эслатди.
«Тошкент ҳам Андижонга ўхшаб боряпти. Ер камайяпти. Энди ускуналарни 2−3 қаватга чиқариш керак. Чиқармасак, эртага ер топа олмаймиз, келгуси йил ҳам ривожланишимиз керак. Келгуси йилда қаерга бориб Янгиҳаётдан ер топиб бераман?», — деди президент.
«Мана Японияга бордик, 40-қаватда станоклар турибди, Хитойда 51-қаватда шундай станок бизни ёнимизда ишлаб турганди. Бизда бир пақир сувни тепага олиб чиқолмаймиз», — деди президент.
Технопаркда қуриладиган корхоналарда 20 минг кишини иш билан таъминлаш режалаштирилмоқда. Биринчи босқичда 110 гектар майдонда 42 та участкада лойиҳаларни жойлаштириш орқали 500 миллион долларлик инвестиция жалб этиш ва ишлаб чиқариш ҳажмини 200 миллион долларга етказиш режалаштирилган. Иккинчи босқичда 400 миллион долларлик инвестицияларни жалб қилиш учун 100 гектар ер майдонидан 10 та лот ажратилади.
