2022 йилнинг январь ойида 14 мингдан ортиқ енгил автомобил ишлаб чиқарилган. Бу ҳақда Давлат статистика қўмитаси хабар берди.
Енгил автомобиллар ишлаб чиқариш ҳажми ўтган йилнинг мос даври билан солиштирилганда 8 811 тага ошган. Бироқ, 2021 йилнинг январида автомобиль заводи модернизация қилиниши учун автомобиль ишлаб чиқариш тўхтатилган. 2020 йилнинг январь ойи билан таққослаганда эса 57 фоизга пасайган. Бундан кўринадики, енгил автомобиль чиқариш пандемиядан олдинги даврдан пастроқ кўрсаткични қайд этмоқда.
Йил бошида ишлаб чиқарилган автомобиллар сони русмлар бўйича қуйидагича кўринишда:
- Lacetti-Gentra — 4 216 дона (2020 йилда 5078 та)
- Damas — 3 652 дона (3989 та)
- Cobalt — 3 393 дона (5078 та)
- Nexia T-250 — 713 дона (5962 та)
- Spark — 323 дона (2320 та)
- Махсус енгил автомобиллар — 1 749 дона (311 та).
2020 йил кўрсаткичларидан Cobalt ишлаб чиқариш 50 фоизга, Nexia T-250 ишлаб чиқариш 8,3 баробарга, Damas ишлаб чиқариш 9,2 фоизга, Spark ишлаб чиқариш 7,2 баробарга ортда қолмоқда.
Электромобиль
2022 йилнинг январь ойида Ўзбекистон 3 та хорижий давлатдан қиймати 3,1 млн долларга тенг бўлган 122 та электромобиль импорт қилди. Электромобиль импорти 2021 йилнинг мос даврига нисбатан 70 тага ошган.
Электромобиллар асосан Хитойдан — 119 та, Эстониядан — 2 та ва Германиядан — 1 та олиб келинган.
Эслатиб ўтамиз, бундан олдин «Ўзавтосаноат» ва Хитойнинг йирик электромобиль ишлаб чиқарувчиси BYD Auto Industry ўртасида Ўзбекистонда электромобиль ва электробуслар ишлаб чиқариш бўйича ҳамкорлик меморандуми имзоланганди. UzAuto раҳбари ўринбосари Азизбек Шукуров буни «электромобиллар келажаги сари биринчи қадам» деб атади.
