Адлия вазири Русланбек Давлетов жамоатчиликка ҳисоботи давомида баъзи домлаларнинг маърузалари жамиятда бўлинишга олиб келаётганлигини таъкидлаб, вазирлик ушбу соҳани назорат қилишини эслатди. Бу ҳақда «Газета.uz» мухбири хабар берди.
«Диний ташкилотларнинг айрим вакиллари чиқиб, „У ишни қилса, бундай бўлар экан, бу ишни қилса, бундай бўлади. Уни уйига кирманг. Бу нарсани ичса, бундай бўлади, бу маълум бир вилоятликлар бундай“, деган гапига ҳуқуқ нуқтаи назаридан биз чидаб туролмаймиз. Чунки бу, биринчидан, жамиятимизнинг бўлинишига олиб келяпти, иккинчидан, диний ташкилотларнинг бундай ихтилоф қилишга ҳаққи йўқ. Биласизларми нимага? Асосий сабаб, мана шу айтилаётган инсонлар кимларгадир ҳукм ўқияпти. Ҳамма одамларга тамға босиш ҳуқуқи йўқ», — деди адлия вазири.
У фуқароларнинг виждон эркинлиги бўйича конституцияваий ҳуқуқини эслатиб ўтди.
«Динга хоҳласа, ишонади, хоҳламаса, ишонмайди. Хоҳламаса, умуман тарки дунё қилиб яшайди. Бу конституциявий ҳуқуқ. Шунинг учун қонунда белгиланган ҳуқуқлар, кафолатларни кимлардир чиқиб, ижтимоий мақомидан қатъи назар, инкор қилолмайди, уларга даҳл қилолмайди», — деди Русланбек Давлетов.
Шунингдек, вазир диний ташкилотларга ва барча шу соҳадаги домлаларга «сигнал» бермоқчи эканини маълум қилди.
«Бир сигнални диний ташкилотларга ва барча шу соҳадаги домлаларимизга етказиб қўймоқчимизки, биз Адлия вазирлиги сифатида бу фаолиятни назорат қиламиз. Биз бу борада жуда фаол ишлаймиз. Чунки ҳеч қачон бу масалаларни бир нормага келтириб бўлмайди. Ҳамманинг ўз фикри бўлади, бу эса бўлинишга олиб келаверади. Шунинг учун ҳам қонунда ҳамма ўзи ҳал қилади, деган. Бекорга айтилмаган виждон эркинлиги, деб. [Ҳамма] виждонининг олдида ўзи жавоб беради. Бўлмаса, аҳлоқ полицияси қилайлик, кўчага чиқиб юбкаларнинг узун-калталигини ўлчайлик. Бунинг охири бўлмайди. Ҳаммада ёндашув ҳар хил. Мен бу гапларни ҳуқуқий нуқтаи назардан айтаяпман. Менинг аҳлоқий нормалар тўғрисида гапиришга ҳаққим йўқ. Гапирсамам, ўзимнинг фуқаро сифатидаги фикримни айта оламан», — деди адлия вазири.
Русланбек Давлетов барча соҳаларда ўз мутахассиси борлигини ҳам эслатиб ўтди.
«Ҳамма соҳада мутахассислик етишмайди. Домлаларимиз ҳам гапиради, лекин ҳар бир одам ҳар бир соҳада мутахассис бўлолмайди. Мен ҳам ўзимнинг бир-иккита соҳамни биламан. Яъни ҳуқуқ соҳасиниям ичидаги айрим йўналишларни биламан. Қолганлари бўйича индамай тураман. Чунки унга бизнинг малакамиз етишмайди. Шунинг учун ақллилик қилмаймиз», — дея таъкидлади у.
Адлия вазири ўз сўзини Девид Фрименнинг «Одамларнинг дўзахга кириш-кирмаслик танловини ўзларига қўйиб беринглар», деган сўзлари билан якунлади.
«Ўзи киради-ку кирса, бу жамият ривожланиши учун катта аҳамиятга эга бўлган нарсалар. Шунинг учун ўзининг диний ўлчовлари, уйидаги қарашлари билан жамиятга ўлчов қўйишга йўл қўймаймиз, чунки қонун бор, тамом», — деди Давлетов.
2021 йилнинг сентябрь ойида Адлия вазирлиги Ўзбекистон дунёвийлик принципида ривожланиш йўлини танлаганлигини эслатиб баёнот билан чиққан эди. «Ўзбекистонда диний қарашларни мажбуран сингдиришга йўл қўйилмайди», дейилган эди вазирлик баёнотида.
