1 январдан эътиборан автомобиль сотиб олганлик учун йиғим бекор қилинди. Мазкур йиғим 2022 йил учун Давлат бюджети тўғрисидаги қонунда назарда тутилмаган.

Бу эса автомобиль харид қилганда тўланадиган йиғим тўлиқ бекор қилинганини англатади. Ҳозирга қадар амал қилган тартибга мувофиқ, янги машина сотиб олинганда шартнома нархининг 3 фоизи миқдорида йиғим тўланарди.

Иккиламчи бозордан машина харид қилинганда эса ишлаб чиқарилган йилига қараб, ҳар бир от кучи учун 29,7 минг сўмгача йиғим ундирилган.

Аввалроқ, мазкур ўзгартишлар ҳукумат томонидан Олий Мажлис Қонунчилик палатасига 2022 йил учун Давлат бюджети лойиҳаси ва Бюджетномасига киритилгани ҳақида ёзгандик.

Қолаверса, депутат Дониёр Ғаниев ўзининг Молия вазирлигидаги манбаларига таяниб, «Давлат божи тўғрисида»ги қонунга ҳам ўзгартиш киритилиши кутилаётганини маълум қилганди. Унга мувофиқ, автомобиль олди-сотди шартномасини нотариал расмийлаштириш учун ундириладиган давлат божи, транспорт воситасининг от кучи ва ишлаб чиқарилган санасидан қатъий назар БҲМнинг 3 баробари (810 минг сўм) этиб белгиланади (ҳозирча кучга киргани йўқ). Амалда эса БҲМнинг 2 баробаридан 10 бараваригача (540 минг сўмдан — 2,7 млн сўмгача) миқдорда белгиланган.

Демак, «2022 йил учун Давлат бюджети тўғрисида»ги қонунни қабул қилиниши ҳамда «Давлат божи тўғрисида»ги қонунга тегишли ўзгртириш киритиш ортидан иккиламчи бозордан сотиб олинган автомобилни расмийлаштириш харажатлари кескин камаяди, деб ёзганди депутат.