Ўзбекистон ХДП туман кенгаши раиси, танқидий чиқишлари билан танилган Феруза Бабашеванинг номаълум эркак билан тўшакда ётгани акс этган видеролавҳа тарқалиши ортидан унинг депутатлик ваколатлари муддатидан илгари тугатилди.
Мазкур масала Халқ депутатлари Ўрта Чирчиқ тумани Кенгашининг навбатдан ташқари сессиясида кўриб чиқилган.
Туман ҳокимлиги хабарига кўра, мазкур сессия Кенгаш депутатларнинг ташаббуси билан чақирилган.
Унда фақат битта масала, туман Кенгашининг 30-«Уйшун» сайлов округидан сайланган депутатнинг ваколатини тугатиш масаласи кўрилган.
Сессия ишида Халқ депутатлари туман Кенгаши «Регламент ва депутатлик одоби масалалари бўйича доимий комиссия» раиси Дилором Зулёрованинг ахбороти эшитилган.
Комиссия раисининг ахбороти ва депутатларнинг қўшимча таклиф, фикр-мулоҳазалари инобатга олинган ҳамда қарорни сессияда қатнашган 24 нафар депутатдан 23 нафари ёқлаб овоз берган.
Эслатиб ўтамиз, аввалроқ, Ўртачирчиқ туман Халқ депутатлари Кенгаши ёпиқ мажлисда прокурор тақдимномасига кўра депутат Феруза Бабашевани дахлсизлик ҳуқуқидан ҳам маҳрум қилганди.
Бунга қадар «Газета.uz» депутат Феруза Бабашеванинг атрофида нималар содир бўлаётгани ҳақида батафсил ёзганди.
Унда, 9 ноябрь куни прокуратура маҳаллий депутат Феруза Бабашевани «Агробанк» бошқарма бошлиғининг аризаси туфайли дахлсизлик ҳуқуқидан маҳрум қилиш тўғрисида тақдимнома киритгани қайд этилганди.
Шундан сўнг, бир неча кундан сўнг ижтимоий тармоқларда октябрь ойи бошида тасвирга олинган ва депутатнинг эркак киши билан тўшакдаги ҳолати акс этган тасвирлар пайдо бўлди. Феруза Бабашева вилоят ИИББ ходимларини таҳдид қилиш ва босим уюштиришда айблаганди.
Жамоатчилик депутатни ҳимоя қилиб чиқди. ХДП шахсий ҳаётга аралашишга йўл қўйиб бўлмаслигини эслатди.
