UzAuto Motors компанияси Chevrolet Captiva 5 автомобилини етказиб бериш бўйича бекор қилинган шартномаларнинг маблағларини қайтаради ва компенсацияни амалга оширишини маълум қилди.
Қайд этилишича, Chevrolet Captiva 5 автомобили бўйича жами 461 та шартнома пули тўланган. Айни пайтда, 207 нафар харидор ушбу автомобил ўрнига бошқа транспорт ваоситасини олишга қарор қилган, 161 нафари эса тўланган маблағни қайтарилиши учун ариза билан мурожаат қилган ва уларга пуллари қайтариб берилган. 41 нафар мижозлар кечадан бошлаб компенсация сифатида тақдим этилган 5 фоизлик тўлов суммасини олган.
Компания хабарида келтирилишича, қолган харидорлар ҳам ўз маблағлари ва компенсацияни яқин икки-уч кун ичида олади.
Аввалроқ, UzAuto Motors компанияси Chevrolet Captiva 5 автомобилларини етказиб бериш бўйича шартномалар тузишни тўхтатишга мажбур эканлигинини маълум қилганди.
Компания баёнотида мижозлар мурожаатидан кейин 3 кун ичида тузилган шартномалар бўйича тўланган барча маблағлар тўлиқ қайтарилиши айтилганди. Шунингдек, компания қўшимча равишда олдиндан тўлов суммасининг 5 фоизини компенсация сифатида тақдим этилиши ҳақида келтирилганди.
