Ўзбекистон ногиронлар жамияти, Ўзбекистон карлар жамияти ва Ўзбекистон кўзи ожизлар жамиятлари сенаторлар 20 ялпи мажлисда рад этган «Ижтимоий тадбиркорлик тўғрисида»ги қонунни маъқуллашни сўраб, Сенатга мурожаат қилгани ҳақида ёзгандик. Унда имконияти чекланган шахслар ушбу қонунни бир неча йилдан бери кутаётгани, аслида «бошидан ўтказган» инсонгина ҳолат қандайлигини билиши таъкидланган эди.
Мурожаат юзасидан Сенат аъзолари Одилжон Иминов ва Эркин Гадоев жамиятлар раҳбарлари билан учрашиб, суҳбат ўтказди, деб хабар бермоқда Сенат ахборот хизмати.
«Учрашувда мурожаатчиларга қонун ногирон, карлар ва кўзи ожизлар жамиятларининг мурожаатномасида келтирилган масалалар, яъни имконияти чекланган шахсларга майдонда ўзларини кўрсатиш, имкониятларини тўла намоён этиш, муносиб иш ҳақи олиш, ижтимоий адолат нуқтаи назаридан корхоналарнинг иқтисодий аҳволини янада яхшилаш, ишини фаоллаштириш, ишлаб чиқариш ҳажмлари ва ишчилар сонини ошириш, энг асосийси имконияти чекланган шахсларга тўғридан-тўғри имтиёз ва преференциялар беришни назарда тутмаслиги тушунтирилди», — дейилади хабарда.
Шу билан бирга, сенаторлар томонидан «Ижтимоий тадбиркорлик тўғрисида»ги қонундаги нормалар жамиятларнинг раислари сўраётган мақсадларга хизмат қилмаслиги айтилган.
«Имконияти чекланган шахсларга ўз фаолиятларини амалга ошириш учун имтиёзлар ҳозир ҳам Солиқ кодекси, Ўзбекистон президенти ҳамда Вазирлар Маҳкамасининг ҳужжатларида ўз аксини топганлиги, келгусида тадбиркорлик соҳасидаги муносабатлар ҳамда норматив-ҳуқуқий ҳужжатлар ягона Кодексда назарда тутилиши таъкидлаб ўтилди», — дейилган юқори палата жавобида.
Бундан ташқари, қонун қайтарилди дегани — бу у батамом бекор қилинди дегани эмаслиги яна бир бор эслатиб ўтилган. У кейинчалик парламент вакиллари, экспертлар, қонун ташаббускорлари билан биргаликда янада пухта ишланиб, кейинги ялпи мажлисларда қайтадан муҳокамага қўйилиши айтилган.
Суҳбат якунида Сенат аъзолари томонидан мазкур қонунни қайта ишлаш жараёнида жамиятлар вакиллари ҳам фаол иштирок этиши ва мунтазам равишда доимий ҳамкорлик қилиниши ҳақида келишиб олинган.
Эслатиб ўтамиз, Ногиронлар, Карлар ва Кўзи ожизлар жамиятлари ўз мурожаатида уларга қарашли корхоналар даромади кескин тушиб кетганини ҳам таъкидлаб ўтганди.
Жумладан, сўнгги 3 йилда Карлар жамияти корхоналарининг даромади 5 бараваргача тушиб кетгани, улардаги ишчилар сони эса 2000 йилдаги 4900 кишидан 2020 йилга келиб 1479 нафарга камайгани айтилган.
Айнан мазкур қонун муҳокамаси адлия вазири ва сенаторлар ўртасидаги дебатга айланиб кетган эди. Вазир Русланбек Давлетов сенаторларнинг қонунни қабул қилишга қарши билдирган ҳар бир аргументини рад этиб, айрим сиёсатчилар «халқдан келиб чиқаётган янги ғояларни тушунмаслигини» таъкидлаганди. Оқибатда Сенат раҳбари узоқ давом этган дебатга аралашишга ва томонларни тинчлантиришга мажбур бўлганди (видео).
