25 сентябрь куни бўлиб ўтган ҳисобот-сайлов конгрессида Давлат хавфсизлик хизмати раиси Абдусалом Азизов Ўзбекистон футбол ассоциацияси президенти лавозимига қайта сайланди. Бу ҳақда «Газета.uz» мухбири хабар берди.
Конгресс раиси Хабибулла Мирзахановнинг маълум қилишича, 45та аъзо ташкилот ЎФА президенти лавозимига Абдусалом Азизов номзодини илгари сурган, 42та аъзо ташкилот эса ЎФА биринчи вице-президенти лавозимига Равшан Эрматов номзодини илгари сурган.
«Шу боис Абдусалом Азизов ва Равшан Эрматовни яна бир бор ўз лавозимларига қайта сайланганлари билан табриклайман», — деди Хабибулла Мирзаханов.
Эслатиб ўтамиз, 2019 йилнинг 15 июлида бўлиб ўтган навбатдан ташқари конференцияда Абдусалом Азизов ЎФА президенти, Равшан Эрматов эса ЎФА биринчи вице-президенти этиб сайланган эди.
