15 июль куни бўлиб ўтган навбатдан ташқари конференцияда Давлат хавфсизлик хизмати раиси, собиқ мудофаа вазири Абдусалом Азизов Ўзбекистон футбол ассоциацияси президенти лавозимига сайланди. Бу ҳақда ЎФА матбуот хизмати хабар қилди.
Ўтган йилнинг январидан ассоциацияга раҳбарлик қилиб келаётган бош вазир биринчи ўринбосари, транспорт вазири Очилбой Раматов ўз хоҳиши билан истеъфога чиқиш тўғрисида ариза берди.
Конференция делегатлари ҳакам Равшан Эрматовни ЎФА биринчи вице-президенти, ички ишлар вазири ўринбосари Муҳиддин Жўраевни вице-президент лавозимига сайлади. Бунга қадар улар вице-президент вазифасини вақтинча бажарувчи сифатида фаолият кўрсатиб келаётган эди.
Абдусалом Азизов ўз чиқишида ўзбек футболида ҳал қилиниши керак бўлган кўплаб муаммолар мавжудлигини таъкидлади. Асосий вазифалардан бири — «ички чемпионатни кучайтириш, мухлисларни стадионларга қайтариш, клублар ўртасидаги рақобатни кучайтириш"дан иборат эканини маълум қилди.
«Футболимизни орқага тортаётган иллатлардан бўлган келишилган ўйинлар ва тотализаторда иштирок этиш каби ҳолатлар билан кескин курашамиз. Охирги йилларда мусобақа регламенти мунтазам равишда бузилиб келинганлигидан хаттоки халқаро футбол ташкилотларининг ҳам хабари бор. Бундан буёғига биз спорт принципларини устувор деб билиб, регламентни ҳурмат қилишимиз шарт!» — деди ассоциациянинг янги раҳбари.
«Биз нафақат футболимизнинг бугунги куни, балки эртаси ҳакида ҳам ҳозирдан бош қотиришимиз керак. Бунинг учун болалар ва ўсмирлар футболидаги вазиятни тўлиқ ўрганиб чиқиб, зарур чора — тадбирлар орқали фарзандларимизга керакли барча шароитларни яратиб беришимиз керак», — деди у.
Абдусалом Азизов Ўзбекистон футболчиларининг жаҳон чемпионатига йўлланма қўлга киритишлари учун барча шароитлар яратилишига ваъда берди.
