Тошкентда метро вагонида 13 ёшли қизга нисбатан беҳаё ҳаракатларда гумон қилинган эркак қидирилаётгани ҳақида хабар берган эдик. Ҳодиса 18 сентябрь куни соат тахминан 17:00ларда Тошкент метрополитенининг «Олмазор» бекатида содир бўлган. Қиз эркакнинг ҳаракатларини видеога олиб, интернетда эълон қилган.
Ички ишлар вазирлиги матбуот котиби Шохрух Гиясов хабар беришича, қидирилаётган шахс қўлга олинди.
У илгари Жиноят кодексининг 166 (талончилик), 169 (ўғирлик) ҳамда 127 (вояга етмаган шахсни ғайриижтимоий хатти-ҳаракатларга жалб қилиш) моддаларида кўрсатилган жиноятларни содир этганлиги учун судланган, Тошкент шаҳрининг Олмазор туманида яшовчи, 1989 й.т., фуқаро К.Ш. эканлиги аниқланди, дейилади хабарда.
Ҳозирда, ИИВ Транспорт ва туризм объектларида хавфсизликни таъминлаш департаменти томонидан мазкур шахснинг ҳаракатларида вояга етмаган шахсга нисбатан уятсиз-бузуқ ҳаракатлар содир этиш жиноятининг аломатлари мавжудлиги текширилмоқда.
«Агар сиз ёки яқинларингиз ушбу фотосуратда кўрсатилган шахснинг ҳаракатларидан жабрланган бўлсангиз, дарҳол 102 рақамига ёки яқин орадаги ички ишлар органига хабар беришингиз сўралади», — дейилади хабарда.
Бош прокуратура матбуот котиби Хаёт Шамсутдинов хабар беришича, ушбу ҳолат юзасидан Жиноят кодексининг 129-моддаси (ўн олти ёшга тўлмаган шахсга нисбатан уятсиз-бузуқ ҳаракатлар қилиш) билан жиноят иши қўзғатилди.
