Ўзбекистон Халқ демократик партияси (ХДП) депутати Раъно Турдибоева Либерал-демократик партиясидан (ЎзЛиДеП) президентликка номзод қилиб кўрсатилган Шавкат Мирзиёевнинг ишончли вакили бўлди.

Марказий сайлов комиссияси ишончли вакилларни 15 сентябрда рўйхатга олди. Сайлов кодексининг 43-моддасига мувофиқ Ўзбекистон президентлигига номзод ўн беш нафарга қадар ишончли вакилга эга бўлишга ҳақли. Номзоднинг ишончли вакиллари унинг тақдимномасига биноан Марказий сайлов комиссияси томонидан рўйхатга олинади, Марказий сайлов комиссияси уларга тегишли гувоҳномалар беради. Ишончли вакил сайлов комиссиясининг аъзоси бўлиши мумкин эмас.

Олий Мажлис Қонунчилик палатаси депутати, ЎзЛиДеП фракцияси аъзоси Расул Кушербаев ҳам бунга эътибор қаратди. У қонунчиликда бир партия аъзосининг бошқа партиядан президентликка номзодга ишончли вакил бўлиши учун тақиқ қўйилмаганлигини қайд этди.

Расул Кушербаев Раъно Турдибоевани депутатлик сайловларида ўзи билан битта сайлов округидан депутатликка номзод бўлганини эслади. Унинг сўзларига кўра, Раъно Турдибоева ХДПга аъзо бўлмаса-да, номзод этиб кўрсатилган. ХДП ахборот хизматининг «Газета.uz»га маълум қилишича, Раъно Турдибоева 3 ой аввал партия аъзолигидан чиққан.

Маълумот учун, Раъно Турдибоева 31-Қибрай (Байтқўрғон) сайлов округидан Халқ депутатлари Тошкент вилоят Кенгашига депутат этиб сайланган.