Ижтимоий тармоқларда бугун, 20 сентябрь куни эрталаб пойтахт метросидаги бекатлардан бирида, бўш вагон эшиги олдида йўловчиларнинг йиғилиб тургани акс этган видео тарқалди. Тошкент метрополитени маъмурияти ушбу ҳолат юзасидан расмий изоҳ берди.
«09:10 да Ғофур Ғулом бекатидан Чорсу бекатига ҳаракатланиши лозим бўлган 41-йўналишдаги ҳаракат таркибида ҳаво тақсимлаш тизимида техник носозлик юзага келган», дейилади хабарда.
Ҳаракат хавфсизлигини таъминлаш мақсадида йўловчилар бекатда тушурилган ва ортда ҳаракатланиб келган 43-йўналишдаги ҳаракат таркиби ёрдам сифатида келиб, носоз ҳаракат таркибини техник кўрик пунктига олиб кетган. Техник носозлик 09:25 да бартараф этилган.
Метрополитен маъмурияти йўловчилардан келтирилган ноқулайликлар учун узр сўради.
