Roodell компанияси Ўзбекистонда «яқин вақтларда» Renault автомобиллари савдосини бошлашни режалаштирмоқда. Бу ҳақда компания матбуот хизмати «Газета.uz»га хабар қилди.

Дастлаб учта модел — Arkana ва Kaptur кроссоверлари ҳамда Duster йўлтанламасини сотувга чиқариш мўлжалланган.

«Биз барча ҳужжатларни имзолашни якунлаш арафасидамиз. Штаб-квартирадан якуний ахборот бўлиши билан эълон қиламиз», — дея маълум қилди Roodell вакили.

«Газета.uz» Жиззахдаги ADM-Jizzakh заводида LADA ва Renault автомобилларини йиғишни йўлга қўйиш режалаштирилаётгани ҳақида ёзган эди. Инвестиция дастурига кўра, лойиҳавий қуввати йилига 100 минг дона автомобилни ташкил этади. Лойиҳа 60,9 млн долларга баҳоланган бўлиб, унинг 33,3 млн долларини 2021 йилда ўзлаштириш белгиланган.

Spot нашрининг ёзишича, Renault Group Lada русумли автомобилларни етказиб бериш билан Ўзбекистон бозорига кириб келган. Бозорда Lada ва Kia автомобилларини сотишни йўлга қўйган Roodell унинг маҳаллий ҳамкори ҳисобланади.

Россияда Arkana нархи 1,28 млн рублдан ($17,6 минг), Kaptur — 1,2 млн рублдан ($16,5 минг), Duster — 1,01 млн рублдан ($13,9 минг) бошланади.