Теннисда ҳалолликни таъминлаш халқаро агентлиги (ITIA) 2019 йилда бўлиб ўтган турнирда келишилган ўйинлар бўйича ўтказилган терговдан сўнг, ўзбекистонлик икки теннисчи Темур Исмоилов ва Амал Султонбековнинг спортдан четлатилганлигини тасдиқлади.
Аввалги терговдан сўнг 7 йилга спортдан четлатилган Исмоилов энди 2021 йил 21 июлдан бошлаб бир умрга спортдан четлатилди ва қўшимча равишда 14 минг доллар жаримага тортилди. Султонбеков 2021 йил 21 июлдан 2026 йил 21 июлгача спортдан беш йилга четлатилиб, 8000 доллар миқдоридаги жаримага тортилган.
Исмоиловнинг ATP рейтингидаги энг юқори кўрсаткичи — 397, Султонбековда эса 1886 эди.
Иш Коррупцияга қарши курашиш бўйича эшитиш офицери Жени Сублиер томонидан олиб борилди ва мазкур санкциялар спортчиларга бошқарув органлари томонидан рўйхатга олинган ёки ўтказиладиган ҳар қандай теннис мусобақаларида ўйнаш ёки қатнашиш тақиқланишини англатади.
Иккала теннисчи ҳам Тенниснинг Коррупцияга қарши Дастури (TACP) қоидаларининг учта бандини бузганликда айбдор деб топилган.
Маълумотга кўра, қоидабузарликлар орасида бирор кишини ўйин натижасига таъсир ўтказишга ундаш, ўйин натижасига таъсир ўтказишга рози бўлиш, ўйин натижасига таъсир ўтказиш учун пул ёки бошқа фойда олиш каби ҳолатлар бор.
Бундан ташқари, Исмоилов ўйинчини бирор бир тадбирда ўзининг бор кучини намойиш қилмасликка ундаганликда ҳам айбдор деб топилган.
Дастурда белгиланишича, ўйиннинг натижаларига таъсир кўрсатиш учун спортчига пул, бирор фойда, рағбат ёки инсайдерлик маълумоти таклиф этилса у иложи борича тезроқ бу ҳақда TIU га хабар бериши керак.
