Коронавирусга қарши кураш штаби аъзоси, санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Ўзбекистонда коронавирусга қарши мажбурий эмлаш ғоясини тўғри деб ҳисоблайди. Бу ҳақда у сешанба куни АОКАда бўлиб ўтган брифингда айтиб ўтди.
Унинг сўзларига кўра, мамлакатда 3000 дан ортиқ эмлаш марказлари ва 800 та мобил гуруҳлар ташкил этилган, аммо эмлаш даражаси пастлигича қолмоқда.
«Афсуски, биз кунига 130−140 минг кишини эмлаяпмиз. Ҳозирга қадар Ўзбекистонда 4,2 млн дозадан ортиқ вакциналар ишлатилган. Деярли 700 минг киши бутун эмлаш курсини тўлиқ якунлади. Бу жуда кичик кўрсаткич», — дея қўшимча қилади Нурмат Отабеков.
СЭС раҳбари ўринбосарининг фикрига кўра, Ўзбекистон эмлаш орқали аҳолининг 60−70 фоизида коллектив иммунитетни шакллантиришни таъминламагунча, «вазиятни барқарор ушлаб туриш мумкин бўлмайди».
«Менинг фикримча, мажбурий эмлаш — бу тўғри ғоя. Чунки биз ўзимизни эмлаш орқали ҳимоя қиламиз. Эмланиш орқали биз нафақат ўзимизни, балки атрофимизни ҳам касалликдан ҳимоя қиламиз. Эҳтимол, Россиянинг тажрибасини қўллаш керак, у ерда эмланмаганларга иш жойига боришга рухсат берилмайди», — деди мутахассис.
Нурмат Отабековнинг айтишича, Ўзбекистонда эмлаш бепул ва ихтиёрий бўлиб қолмоқда.
Коронавирус штаби аъзоси, шунингдек, карантин чекловларининг кучайтирилиши фуқароларнинг иқтисодий аҳволига салбий таъсир кўрсатишини тушунтирди. Шу билан бирга, у қатъий чекловлар билан эпидемиологик вазиятни тезда барқарорлаштириш мумкинлигини тан олди.
Россиянинг бир қатор ҳудудларида фуқароларнинг айрим тоифаларини коронавирусга қарши мажбурий эмлаш жорий этилмоқда. Москва шаҳрида биринчи бўлиб аҳолининг бир қисмини мажбурий эмлаш жорий қилинди. Унинг ортидан худди шу қарор Ленинград, Твер, Кемерово, Свердловск, Смоленск ва бошқа вилоятларнинг ҳукуматлари томонидан қабул қилинди. Мажбурий эмлашдан ташқари, Москва ва вилоятларда қўшимча чекловлар жорий этилмоқда.
Шунингдек, Тожикистон ҳукумати мамлакатнинг 18 ёшдан катта аҳолиси учун коронавирусга қарши мажбурий эмлашни эълон қилди. Бугунги кунда мамлакатда Ҳиндистонда ишлаб чиқарилган AstraZeneca вакцинаси ва CinoVac компаниясининг CinoVac вакциналари қўлланилмоқда.
Уч ой ичида Ўзбекистонда, ССВ маълумотларига кўра, 685,5 минг киши коронавирусга қарши тўлиқ эмланди. Бу доимий аҳолининг (33,9 миллион) 2 фоизи ёки 19 ёшдан катта бўлган аҳолининг 3,1 фоизи демакдир.
