Исроил COVID-19 билан касалланиш ҳолатлари ошгани сабабли жума кунидан бошлаб ёпиқ жойларда ниқоб тақиш режимига қайтмоқда, дея хабар бермоқда РИА Новости Исроил Соғлиқни сақлаш вазирлигига таяниб.

«Касалланиш ҳолатларининг кўпайиши муносабати билан бугун соат 12:00 дан барча ёпиқ жойларда ниқоб тақиш режими жорий қилинади. Очиқ жойлар бундан мустасно», — дейилади хабарда.

Қайд этилишича, 7 ёшгача бўлган болалар, шунингдек, спорт билан шуғулланилаётган вақтда ниқоб тақиш мажбурий эмас.

Шу ҳафта бошида Исроил бош вазири Нафтали Беннетт фуқароларни коронавируснинг «дельта» штаммининг тарқалаётгани муносабати билан чет элга саёҳат қилишдан тийилишга чақирди. Бу ҳозирча қатъий талаб эмас.

Эслатиб ўтамиз, Исроилда 18 апрелдан бошлаб кўчада ниқоб тақмасликка рухсат берилган эди.

Аввалроқ, «Газета.uz» Исроил коронавирусни қандай енгаётгани ҳақида ёзган эди.