Дубайнинг Quadro IH DMCC Тошкент шаҳридаги «Ичан қалъа» меҳмонхонасини хусусийлаштириш бўйича ўтказилган танловда ғолиб бўлди, деб хабар берди Давлат активларини бошқариш агентлиги матбуот хизмати.
«Ичан қалъа» мулк комплекси пойтахтнинг Яккасарой туманидаги Юсуф Хос Хожиб кўчасида жойлашган.
74,2 млрд сўмни таклиф қилган компания танлов ғолибига айланди. Spot ва бошқа ОАВлар ёзишича, меҳмонхона илгари Ўзбекистон биринчи президентининг қизи Гулнора Каримовага тегишли бўлган ва Чорвоқ сув омбори соҳилидаги Сижжак дам олиш зонаси билан бирга давлат назоратига ўтган.
Quadro IH DMCC — бу БААнинг тўғридан тўғри инвестициялар жамғармаси бошқарув компанияси Quadro Capital Partners`нинг бир қисми бўлиб, Россия ва бошқа МДҲ мамлакатларида ўсиш ва инқирозни бошқариш инвестицияларига ихтисослашган. У 2009 йилда Troika Dialog инвестиция компаниясининг вакиллари томонидан ташкил этилган.
Ўтган йиллар давомида Quadro Capital Partners Россиянинг бир нечта лойиҳаларига, масалан, Fix Price дўконлари тармоғи, «Монетка» супермаркетлар тармоғи, MX GROUP, FX CLUB автомобиль маҳсулотлари бозори ва бошқаларга сармоя киритган.
