Чоршанба куни АОКАда ўтказилган матбуот анжуманида адлия вазири Русланбек Давлетов президентнинг ер муносабатларида тенглик ва шаффофликни таъминлаш тўғрисидаги фармони нима сабабдан жамоатчилик муҳокамаси учун эълон қилинмаганига изоҳ берди. Бу ҳақда «Газета.uz» мухбири хабар қилди.

«Фармон жамоатчилик муҳокамасига, бевосита regulation.gov.uz сайтига қўйилмади. Сабаби биз айтган гуруҳ жуда қаттиқ ишларни олиб борди. Фармон эълон қилиниб, жамоатчилик муҳокамасида турса, ноқонуний жараёнлар бирдан кучайиб кетиши эҳтимоли бор эди. Шунинг учун, Бош прокуратура назорати остида, у ёқда [ҳокимлар томонидан] қабул қилиниши мумкин бўлган қарорларни тўхтатиб туриб, мораторий эълон қилиб, шу йўсинда фармон қабул қилинди… Ҳар хил ўйин бўлиб кетмаслиги, бутун давлат миқёсида ерлар талон-торож қилинмаслиги учун мана шунақа ёндошув қилинди», — дея таъкидлади у.

Вазирнинг таъкидлашича, қарорлар қабул қилишда энг катта муаммо — ҳужжатга рақам олиш масаласида. Яъни, олдиндан қарор рақами олиниб, ҳужжат кейинроқ, санаси ўзгартирилиб қабул қилинади.

«Ҳозирни ўзида керак бўлса, қарорларни рўйхатга оладиган журналлар ҳам назоратга олинаяпти… Билиб қўйинглар, номер қўйиш қарорда энг катта аҳамиятга эга бўлган нарса. Қоғозга ёзади-да, номер олиб қўйса бўлди, олдинги сана ёки шу сана билан ёзиб қўяди», — деди у.

Вазир шунингдек, мазкур фармонда акс этган чора-тадбирларни ўзида мужассам қилган қонун лойиҳаси жамоатчилик муҳокамаси учун эълон қилинганини маълум қилди.

Унинг қўшимча қилишича, мазкур фармондан кейин ер ажратиш тўғрисида чиқарилган ҳар қандай қарор ноқонуний ҳисобланади.

«Қандайдир, кимгадир ер бериш бўйича қарор бўлса, бу ноқонуний қарор деган шубҳа билан қараш керак. Чунки, туман даражасида ер бўйича қарор қабул қилиш тугади. Вилоят ҳокимида фақат қишлоқ хўжалиги бўйича [ваколат] қолди», — деди Адлия вазирлиги раҳбари.

Қолаверса, адлия вазири мазкур анжуманда президент фармони билан хорижий инвесторларга ер майдонлари ижарага берилиши ҳақидаги муҳокамаларга муносабат билдирар экан: «Нимага ер берилмаслиги керак?», — деган эди. Қолаверса, вазир чет элликларга фақат ноқишлоқ майдонлардан ер берилиши кўзда тутилганини қайд этди. Бироқ, у айтган тартиб фармонда мавжуд эмас.

Аввалроқ, «Газета.uz» президент фармони билан ҳокимликларнинг ерни тўғридан-тўғри ажратиш ваколати бекор қилингани ҳақида ёзган эди. Шунингдек, айни бир ҳужжат билан ёки бир вақтнинг ўзида ерни олиб қўйиш, захирага олиш, бошқа шахсга ажратиш тақиқланди.