Коронавирусга қарши «Спутник V» вакцинаси биринчи навбатда, 65 ёшдан катталар ва тиббиёт муассасаларида касаллик билан юзма-юз келаётган ходимларни эмлаш учун олиб келинган, дея маълум қилди Санитария-эпидемиолик осойишталик ва жамоат саломатлиги хизмати бошлиғи ўринбосари Ботир Қурбонов.
Унинг таъкидлашича, «„Спутник V“ вакцинаси фақат амалдорлар учун олиб келинган деган қараш жуда нотўғри».
«Тошкент шаҳрида мавжуд эмлаш марказларига ёки эмлаш пунктларига мурожаат қилаётган айрим шахслар ёши 65 ёшдан кам бўлганлиги учун эмланмаётганлиги тўғрисидаги эътирозлар бор. Бир неча маротаба бизни ўзимизга ҳам мурожаат қилишган: „мен „Спутник V“ вакцинаси билан эмланмоқчиман, эмлаш марказига ёки эмлаш пунктига борсам мени қайтаришди“ дейишади. Биринчи навбатда ёши нечадалигини сўраймиз. Ёши 60 да, 50 да, 40 да. Кейинги босқичларда эса эмлаш контингенти ёки жамоаси ўзгаради. Лекин, ҳозирги кунда 65 ёшдан катталарни ихтиёрий равишда, бевосита 3 та вакцинадан бирини танлаган ҳолда эмланиши кўрсатилган», — дея аниқлик киритди СЭС бошлиғи ўринбосари.
Ботир Қурбоновнинг қўшимча қилишича, бугунги кунда қадар Тошкентда 23 минг киши «Спутник V» билан эмланди. Бугун ва эртадан бошлаб республиканинг барча ҳудудларига ушбу вакцинанинг юборилиши кўзда тутилган.
Бунга қадар, яъни 1 май куни Олий Мажлис Қонунчилик палатаси спикери ўринбосари Одилжон Тожиев (1984 йилда туғилган) ўзининг Telegram каналида «Спутник V» билан эмланганини маълум қилган.
Мазкур хабар эълон қилингач, Одилжон Тожиев коронавирусга қарши «Спутник V» вакцинасини олганлиги соғлиғи билан боғлиқ заруратга кўра эканлигини маълум қилди.
